SOMIA JEZUCHEA BAUTISMACHI POROB
Voros B (11/01/09)

Vixoy: Devache Opurbayechim Zaunk Vavrum-ia

Poilem Vachop: Iz 42,1-4.6-7;
DusremVachop: D.I.10,34-38;
Xubhvortoman: Mk 1,7-11

Ek Sfurthi: Ireland desantlo padri sanje vellar dispottim pasoyek vetalo. Tea disa rostear taka ek xetkar bhett'ta. Ani te dogui eka-meka lagim gozal kortat. Oxe te uloita astana okosmat pavs zhoddta ani te dogui eka pornnea ghorachea bolkanvant asro ghetat. Zaito vell meren pavs thambona. Xetkar aplea bolsantlem ek pornnem-pinzkurem Magnnea Pustika bhair kaddun sumarachea avazan magnnem korunk suru korta. Padri taka thoddo vell pollet ravlo ani tachem magnnem somptoch taka mhollem, 'Tum Devak khub lagim asa dista!' Xetkarean sadeponnan mhollem, 'Hoi tor! Taka mhoji chodd opurbai!' Hea tachea mhonn'neant khub zannvai asa. Amchech ostongim ami Devachim ixttam zainant. Devachi ixttagot zhoddunk Devuch amkam bhag favo korta. Tachi ixttagot mhollear amkam Devachem funkott dan. Devakuch lagon ami Tache xim ho ixttagoticho som'bond zhoddtanv.

Devachem Utor: Gelea Aitara borabor krist-Joyonticho kall kobar zalo. Atam ami sadea kallant asanv ani thoddeach sumanani ami Prachit kall suru kortoleanv. Ek sevok Devachi yevzonn soglleank porgott kortolo mhonn Izaias Provadi dorxonant polleta. Ho sevok aplem misanv soglle lhanvikayen ani xant'tayen fuddem vhortolo. Poilea Kristanvamni hea sevokachea rupant Jezuk pollelo zannem soglleanchea taronna pasot seva keli ani Aplo jiv dilo (1lem Vachop). Soglleanchem taronn korunk Devachi khuxi oxem Pedru Judev nhoi tea lokak sermanv sangta. Jezuchea muniarponnachi somzonni diun to mhonnta, 'Povitr Atmea vorvim, Jezu soglleak borem korit gelo. Tachea provadik ani pekovnnechea misanvant Dev Tachea borabor aslo (2rem Vachop). Xubhvortomanant, Juanv Batist Jezuk Bautism dita ani Dev-Bap Jezu vixim uloun oxem mhonnta, 'Tum mhozo opurbayecho Put, Tujer Mhojem dhadosponn asa.' Markuchea Xubhvortomanant, Jezucho Bautism mhotvacho zago gheta.

Amchea Jivitak: Ami sogllim amchea Bautisma vorvim Devachim bhurgim zaleanv. Punn Devan amkam sotea dilea. Hi Devan dil'li sotea boreak vaprun ami Tachim opurbayechim bhurgim zaunk vavrunk ekdom' gorjechem. Jednam ami Povitr Pustokant melltolem Dev-Utor vachun, tea Utra pormonnem amchem jivit manddun hadtanv, tednam ami Devachim opurbayechim bhurgim zatanv. Jednam Devan amkam pallunk dil'lea adnia pormonnem ami jiyetanv, tednam ami Devachim opurbayechim bhurgim zatanv. Jednam ami amche dispottea jivitant doyall kornneo kortanv, tednam ami Devachim opurbayechim bhurgim zatanv. Jednam ami Povitr Atmeachea suchovnneank aitim ani uktim astanv, tednam ami Devachim opurbayechim bhurgim zatanv. Jednam ami amcher chuk kortolea peleak bhogxitanv, dusreank bori dekh ditanv, tednam ami Devachim opurbayechim bhurgim zatanv.

Fr. Ave Maria Afonso.