Bharotant mon'xanchea hok'kanchi poristhiti pollelear chodd lojechi, oxem Somajik ani Mon'xam Hok'kam khatir vavurpi Lenin Raghuvanshi hannem sanglem. ‘Peoples Vigilance Committee on Human Rights’ hacho to son’chalok mhonn vavurta. Tachea mona pormannem Bharotant mon'xam hok'kancho goir-vapor zata, oskotancher ani sokoilea lokacher zaiti onit korta. Tankam nit mellunk borench kottin zata. Dhormik sot'tea ani durboll lokachem  jivit somaza modem unneponnachem zata.
2007 vorsa Mon'xam Hok'kancho Puroskar ghetlolo Gwanju  sanglolea pormannem Bharotant monisponnachea hok'kancher sodanch onit cholta. Dusre vatten pulisanche tras soscho ani tancho mar khauncho poddta. Kaide fokot nanvam purtech kel'le asat, tancho-i favo te porim upyog zaina. Veta thoimsor durbollancher zulumxai cholta. Bhov korun dalit somazachea bailancher ani bhurgeancher zaitich onit cholta. Olp-sonkhecho lok nhoich tancho ankddo thoddo mhonn bogor tanchea jivitachi poristhiti vaitt doxer pavloli asa. Somajik nodren tim zaitim fattim asat, tankam boll podvi na. Dhormik olp-sonkhecho onek vhoddlo proxn. Dhormik sot’tea mhonnlear mon'xacho mullavo hok'k, oxem Lenin Raghuvanshin mhonnlem.
Desache ghottnnent asa tachi khatri dita, punn khoreponnim toxem zaina, zaitem veglleponn vosta. Bharotantle olp-sonkhechea dhormacho lok Hindu bhov-sonkhechea zatim modem jiyeunchem poddta ani Hindu mullvadi zome desantli dhormik sot’tea nakartat. He dharmik sot’techo faido rajki monis vapurtat. Varanaxi xarant pulisecher ani Hindu dhormvadeancher zaiteo kexi nond zal’leo asat. Dusri dekh, mhonnlear Gujaratant Muslimam add marfar toxench Kandhamalantlea Kristanvam add marfar zal’lo pollelo.
Hem monant dhorun Raghuvanshin pulisechi novsornni korchi mhonn odhikaream kodde magta.
Maoist bonddkorancho ani dhormik mullvadeancho hoteachar sompounk zai. Hanchem bodlop zalea bogor mon’xam hok’kanchi poristhiti desantlea bhirankull ghoddnneam modem padd zaunk pavtoli.            AsiaNews