Ponnje: Kankonn toxench Arambol vattharant zal'lea bomb-sfottank lagun Gõychi arthik poristhiti ibaddun veta, oxem adlo Khasdar Xri John  Fernandes-an sanglem.
Nove Dilhi thaun V. Ixtt-a thaim uloitana, varea foujechea kornneancher Gõychea sorkaran nixedh marunk zai ani tannim aplem thikann Gõy thaun pois vhorunk sorkaran magunk goroz asa mhonn Fernandes-an sanglem. Poryottonn ani nustem marop mhonnlear Gõychea arthik udorgoticho mukhel bhag ani varea foujechea kornneam vorvim doryantlea nusteacher sonkoxtt ani bhonvddekarank bekddaupacho proytn zala Poryottonn khatea kodden ek khor nixedh marunk apunn Mukhel Montri Digamber Kamata thaim magtolom mhonn Fernandes-an sanglem.Surokxonn ani Poryottonn sangata vochunk zaina, oxem Fernandes-an sanglem, ani poryottonnachea udorgoti babtint varea fouz ek addkollicho fator, zhoim konnachean kainch  mhonnunk vo korunk zaina, mhonn tannem sanglem.
Varea foujechea proxikxonnachea nanvan, sokallchea 8 tem ek meren Dabolle vimantollar bondi ghalun, ontor'raxttrik toxench raxttrik 'flights' fokt donparchea ek zaun bhitor sorum yetat mhonn tannim ek tharav ghetla. Ponn oslo nirnnoy poryottonnak kosloch faido zauncho na mhonn tannem sanglem.
Gõyche suttke udexim hi dadagiri suru zali karann soinniki sorkaran Gõy 'conquered land' mhonn mandun ghetlem ani az Gõyant soglleak varea svat 'defence control'-acher asa.  Te kaide `Military Governor-a koddlean ailole mhonnttoch, atam he vixim bodlopam korcho vell aila mhonn  tannem sanglem. Tea mhonnosor, bomb-sfott-a vixim varea foujeachem 'clarification' Gõykarank ek dhoko ani tannim Gõykarank oxech lekhleat mhonn Khasdar Shantaram Naik-an sanglem. Surokxon khatea mukhar aplo virodh spoxtt kortolom mhonn tannem sanglem.