Ponnje: 'Right to Information Act'-acho durupeog korun, Xikxonn Khatea koddlean dhavea ani baravea vorgantlea vidhearteanchim toxench tanchea avoi-bapaichim nanvam, fonache ankdde ani pot'te Fatordechea amdar Xri Damu Naik-an magleat dekhun Gõy Pradex Kongres somitiche 'minority cell' an apli khont  porgott'tailea.
Somazachea boreponna khatir nhoi, ponn Gujarat rajyant Labour and Sales Tax khatea koddlean mahiti ghetlea uprant Sangh Parivar-an Musolmanancher akromon kelem, tech toren somajik uchambollaye vellar 'minority' somudayacher akromon korpacho ek hetu, oxem Gõy Pradex Kongres Somitichea minority khateacho mukheli Xri Saifullah B Khan-n sanglem.
Favo purto zobab dinastona Right to Information-a koddlean maglolea vichara khatir Fatordechea amdaran aplo rajinamo diunk favo, oxem tannem fuddem maglem,  karann tache 'communal motives' Bharotache  Ghottnnecher add vetat. To Kaido dor eka Bharoti nagrikache, toxench olpsonkheche  hok'k samballta;  je aple desa khatir visvaxi ravunk bhas ditat. Ekuch pavtt nhoi ponn don pavtti tachi magnni mandun gheun, soglleam iskolamni soglli mahiti tea amdarak diunchi mhonn Xikxonn Khatean maglam dekhun  ojeap dista mhonn Xri Khan-an sanglem.
Desant uchambollai kortoleam vixim sorkaran chotur ravunk goroz asa ani kocherimni unchlea panvddear asloleam sovem add zhuzunk sorkaran panvlam marunk zai mhonn Khan-n sanglem.
BJP-chea koddlean dhormatit vo sekular monachea Gõykaramni pois ravunk zai ani tosleam amdaram thaim kosloch som'bond dovrunk favona mhonn  Xri Khan-n sanglem.
Lokachi mot komi na ani Gõychea vidyartheanchim monam vikhallim korche khatir xallentlea `history' pustokantlo itihas bodlunk BJP sorkaracho proytn aslo mhonn Gõykaramni visrunk favona mhonn tannem  ugddas kelo.