Pilar: Te Dharmik Sonvstheche vangddi vavrak vetat, pogar ghetat ani sadhea mon’xam porim jietat. Te karkhanneamni vavurtat, bazaramni bhaji-pallo viktat ani chamb-ddeachea karkhanneant poryan vavurtat.
Supurlea bhurgeak nhanoitana ani  thoddeach vellan Misa bolidan bhettounk gel'le kodden lokan taka pollela.
“Tum padri?”
“Hoi, lok ghuspagondollak sampoddta, ponn to ek khuxalkayecho ghuspa-gondoll,'' Little Brothers of the Gospel, he Dharmik Sonvsthecho 64 vorsancho Pri. Bartholomeo Dias sangta. Mexico veche adim, sumar 19 vorsam Bharotant ek thovoi koso to vavurlo.
“Sumar 30 vorsam Jezu  vavraddi koso aslo. Lognak vochun, yatra korun, loka modem misoll zaun,  sadhea mon’xam sangata To ek sadhem jivit jiyelo. Poromporik dhyatmik jivitachem mhaka unneponn dislem. Lok sokla ani hanv poile mallier ravona. Sumar 40 vorsam hanv loka sangata misoll zatam, oxem Pri Dias-an spoxtt kelem. Padrinchea gharamni ravunk toxench lokan mhaka manan lekhunk hanv padri zaunk sodhi naslo. Bartholomeo, hem nanv ucharunk lokak tras poddtale mhonn hanvem Bharoti nanv Viswas Bhai ghetlem, oxem tea padrin sanglem.
Ut'tor Bharotant Varanasi ganvant thovoyanchea pongdda sangata sumar 13 vorsam (1975-1988) Pri. Bartholomeo Dias xiklo ani vavurlo. Tea uprant ek thovoi koso Mumboichea Dharvi zhompodd-pott’teamni sumar sov vorsam (1988-1994) tannem vavr kelo. New York xarant ghor-dar nasloleank mozot kortole eke Sonvsthe sangata to vavurlo.Hi Sonvstha 1956 vorsa sthapli, toruiastona Asient, Afrikent, Dokxinn Amerikent ani Eropak ponchvis somudaiamni fokt 80 vangddi asat.
Nazaretcho thovoi dharmik jivitacho ek nommuno. “Amcho zaun asa ixttagoticho aposlad zhoim Naretchea Jezu bhaxen ami lokam sangata jietanv ani tanchea dispott'tea jivitant vantto ghetanv,” oxem Pilar iskolacho adlo vangddi Bro Alexander Noronha-n sanglem. Tannem-i Yesu Das oxem Bharoti nanv ghetlem. Aplea kuttumbak mellche khatir te dogui Goyche better asat.
Dhormik sonsthent bhitor sorunk sodhta astona, Mumboi xharant girest ani goribam modhem vostolea ontorachi mhaka zannvikai mell'li. Tedna, goribanchea dukhant vantto gheunk hanven  nichev kelo,” oxem Bro Yesu Das sangta.
Amche sonsthent apovnnim bhov komi dekhun tem zaun asa amkam ek vhodd avhan. “Chodd-xim sthaploleo sonstha sodhtat. Zantteponnar tanchi poristhiti kosli zait, hache vixim tankam zannkari mellunk na dekhun toxem ghoddta astolem. Zantteponnank ani piddek ami chodd lokx ditanv. Amchi sonstha vichun kaddun, amchea 'brothers'-ank ragan vo dukhant moronk ami divchenanv,” oxem Pri Dias-an sanglem.
Magnneachem jivit, goribam sangata aplem jivit vanttunk tornatteank bhirant disot. Tornattim surokxek chodd lokx ditat. Amchi sonstha tornatteank surokxea ani tenko diunk xeokona, oxem tornnattim chintat astolim,” oxem sonsthecho Sorv-Vhoddil Bro Giuliano Pallicca-n sanglem. Ek bradar he sonthecho sorv-vhoddil zaunk ieta mhonn Roma xharant mandhun ghetlea. He sonsthent sumar 45 tok'ke padri asat.
He sonstheche vangddi veg-vegllea desamni ximpoddlole asat dekhun tem zaun asa anink ek vhodd avhan. Soglle vangddi eka-meka koddsun khup pois asat ani soglleank novean ektthaim haddunk amcho proitn asa, Bro Pallicca-n sanglem.
Bharotant he sonthecho ek somudai asli, punn doguch vangddi ani te-i bhi Goykar dekhun 1994 vorsa ti bond keli. Ektteak East Afrikek Tanzania-k dhaddlo zalear dusreak Mexico-k patthoilo. Akhea sonvsarant Bharotant tem ekuch ghor aslem dekhun, tem bond kelem.
Thoddeam desanim thoddeam bradarancho pogar ekdom boro asa, ani zhoim subez poixe melltat, te poixe ami sonvsarachim dusrim ghoram cholounk vapuddtat.
He sonsthe udexim karkanneanim odhik khol ixttagot bandhun haddunk mell'li. “Vaura uprant, kuttumbanim ami misoll zatanv, tanchea dukhanim vantto ghetanv ani ixttagoti koddlean dharmik prosnn suttave korunk ami vavurtanv,” oxem tannem sanglem.  Charles de Foucauld zaun asa askari te sonthecho. 1916 vorsa ek sanyasi koso Sahara desert-ant to jielo ani somplo. Aplea sopnantle sonsthek tannem boroupam ani jivitache kaide boroun dovorle. Te sonthecho khoro sthapnnar Rene Voillaume Charles de Foucauld-achem jivit vachun moval'lo. 1933 vorsa tannem ti sonstha suru keli ani 1956 vorsa te sonsthek ek novem rup mell'lem. Te sonsthe vangdda 'Little Sisters of Jesus' hea nanva khal, anink ek sonstha asa.