PONNJE: Gõyant hoki khell somp'pache vatter asa, oxem khup lok uloitat. Ponn hi gozal sotachi nhoi. Hoki khellache mogi ani khellpi Gõyant zaite asat te aple tanki pormonnen hanga-thoim lhan-vhodd khell korun hoki khellgoddeank urbha ani ut'tejon ditat. Hea tornamentamni khell-goddeancho ani khell pollennarancho bhorpur nett mellta. Hem sot, oxem Pilarche Sonvsthecho vangddi Pri. Domnic Alvares-an V.Ixttak sanglem.
Pri. Domnic Alvares  huxar hokicho khellgoddi ani eka kallar Monte de Guirim iskolant xiktana, hoki khellant to porzoll’la. Sod'deak to Valpoi-Bironnem kheddea ganvant  gonvlliki vavr korta. Tannem ani tachea sangateamni segit dusre pavtti 'Pioneer Trophy' nanvan tornament ghoddun haddlo. Pilarche Sonvsthechea Sthapnnar sorgest Pri. Bento Martins hachea omor ugddasak  ghoddla. Akhil Gõy patllicher ghoddun haddlolea tornamentant sumar 8 pongddamni vantto ghetlo. He pongodd zavn aslet, Caranzalem United, Margao United, Chowgule Tigers, MRF Kalangutt, Collem Boys, Mapusa XI, Stars of Sat'tari ani Pilar Kolej.  Xevttachea khellant, MRF Kalangutt pongddan Mapusa XI pongddak 3-0golamni harovn, 'Pioneer Trophy' jikhun ghetli. He tornamentache khell Our Lady of Lourdes Igorjechea moidanar zale. Khellache refri Alexander Rosario (State Coach), Victor Albuquerque ani Dexter Pereira hannim bhes bori  ap-apli zababdari pall'li.
Gõychea hoki khella  ani tachea fuddara vixim uloitana Pri. Alvares-an V Ixtt-ak sanglem ki, aichea kallar hoki khellak chulot avoichi (step mother) vagnnuk mellta ti pollevn dukh dista. Halinch Bharotachea hoki pongddan Novi Dilhint  Vixv Kop hoki khellantle poile bhonvddent Pakistan desak haroilo, hi ek tust korpa sarkhi gozal. Gõyant-ui  hea khellak favo tem mhotv mell'lem zalear, hoki khellak porzollit fuddar astolo mhonn Pri Alvares-an  sanglem. Hoki khell Gõyant khup unnea promannan dista mhonnpachi gozal sot asli, tori eka kallar hea khellan Gõyant aplim mullam bhorpur mozbut kel’lim mhonn ami visrunk favona. Gõyantlea hoki khellak goroz to adar ani goroz tea vellar ut'tejon mell’lear, Gõyche hoki khellgoddi adle porim sonvsarant porzolltele mhonn Pri. Alvaresan sanglem
Pilarache padri toxench apli sonvstha hoki khella vixim gombhirponn dakhoita dekhun apleak aple sonvsthecho vhodd obhiman bhogta, oxem Pri Alvares, zaka tea khellachi bhorpur mahiti asa, sanglem. Aplea onnbhova pormonnem nodor marlear aiz hoki khella koddem khup tornatte akorxit zatat, punn tankam favo teo sovloteo mellonaslelean tanchi  umed jiron veta mhonn Pri Alvares-an khont ugttaili.
Mapxeam Duler hanga aslolem ek khellam-moidan soddlem zalear, Goychea her bhagamni hoki khell khellpa sarkem ek porian moidan nam mhonnpachem Pri Alvares-an nodrek haddlem. Goyant hoki khellacho dorzo vaddovpak ganva-ganvanim Astroturf pod'dotichim moidanam bandhun haddunk zai, oxem tannem fuddem sanglem.
Goyant hokiche khellgoddi asat, tanche pongodd asat, tor tankam ho khell fuddem vhoronk lagu zateleam koddlean kiteak mozot mellona? Futtbol, krikett ani her khellam sarkho hoki ho ek khell nhoi? Vochot thoim fokot hoki khella sovem ho bhed-bhav kiteak? Oxe sabar toranche prosn hoki khellpeamchea ani mogeamchea monant  uprastat , oxem Pri Alvares-an fuddem mhonnlem.
Goyant futtbol khell aiz meren jivo urla zalear, ganv-ganvchea lokanim to rakhun dovorla. Ani aiz-kal futtbol-ak sorkara koddlean bhorpur tenko mellonk laglolean futtbol-ak bore dis asat mhonnpak horkot na. Hich gozal Goyant hoki khella sovem ghoddloli zalear, hoki-k porian hanga unchlem sthan mellpachem, oxemPri Alvares-an xevttak sanglem.