Ponnje: Gõyant  Aitaradis  Marsache 7ver Zilla Panchaya-tincheo venchnnuko zateleo. He venchnnukent 195 ume-dvaranchem noxib tharav-pak sumar 7,25,272 lakh motdaram aplem motdan kortolim. Gõyant hi Zilla Panchayatichi tisri venchnnuk. Fattli Zilla Panchayatichi  venchnnuk 2005 vorsa zaleli. Gõyant Zilla Panchayatiche ekunn 50 motdarsongh asat. Hantle 30 Ut'tor Gõyant, zalear 20 Dokxinn Goyant.
Ut'tor Gõyant 4,53,209 motdaram asat. Hantunt 2,27,841 dadle, zalear 2,25,368 bailo motdaram asat. Dokxinn Gõyant 2,72,063 motdaram modle 1,35,087 dadle ani 1,36,976 bailo asat.
Ut'tor Gõyche motdar songh zavn asat Mandrem, Korganv, Dhargal, Torsem, Tivim, Aldona, Penha-da-Frans, Reis Magos, Kalangutt, Anjuna, Saliganv, Siolim, Taleigao, St Cruz, Chimbel, St Lawrence (Agxi), Chorao, Kumbharjua, Latbarsem, Mayem, Pale, Kuddne, Honda, Nagarganv, Kurti, Tivrem, Veling, Bandora, Kavlem ani Shiroda.
Dokxinn Gõyche zavn asat Sankvalle, Kutt'ttale, Nuvem, Raia, Davorlim, Kuddttore, Girddole, Chinchonnem, Vell'lle, Navelle, Bannavlle, Kolva, Sanvorddem, Dharban-dora, Rivona, Sheldem, Bal'li, Fatorpa, Khola ani Poinginnim. He venchnnu-kent 1018 motdan kendram astelim. Hantuntlim  Ut'tor Gõyant 661 motdan kendram  zalear Dokxinn Gõyant 356 motdan kendram astolim. Dor eka kendrant  5  odhikareanchi nemnnuk kelea.
Dokxinn Gõychea Kolva motdar songhantlean Nelly Rodrigues virodh nastana nivddun ailea, hi venchnnuk 49 zageam khatir zavpachi asli. Ponn gelea Sukrara Navele motdarsonghantlo ek umedvar Hermin Fernandes rostear obsoeg zaun ontorlo mhonn hangachi venchnnuk fuddem vhelea. Taka lagun, 50 zageam khatir asleli hi venchnnuk 48 zageancher zateli mhonn odhikari Praful Borkar-an potrkarank  sanglem.
Tech porin, he venchnnuke vellar kosleo vaitt ghoddnneo ghoddonam zavnk  soglli bondabost kelea. Toxench, kosleoi vaitt kortubam kortoleancher karvai kortele mhonn Xri Borkar-an xevottak sanglem.