Ponnje: Gõyant amkam mellta tem dud poryan surokxit na. Dekhun potyanchem dud gheun vapurtana kherit kallji ghenvchi poddteli, oxem V. Ixttan barik pollevnni kelea tache udexim gomun ailam.
‘Goa Dairy’ soddun Gõyant bhesoll (Adulterated) kelelem dud chodd promannen vikrek mellta, hacher Xri Kulkarnichem mot vicharlem tea vellar tannem sanglem ki bhesoll kelolem dud bazarant vikrek yeta mhonnpachi gozal konnuch nakarpak xokchonam. Punn tacher tabo dovorpak vo niyontronn haddpak Gõycheach nhoi punn Bharot sorkaran poryan kosloch koddok kaido toyar korunk na mhonn khont korpa sarki gozal.
Khorem mhonnxi zalear hem bhesoll kelolem dud vikpi konnui sampoddlo zalear, taka 6 mhoine tem 5 vorsam meren bondkhonn favo zanv yeta. Punn azun meren konnakuch oxe torechem bhesoll kelolem dud vikpeak dhorla mhonn aikunk na, oxem hea sorkari odhikarean mhonnlem.
Jem dud ‘Goa Dairy’ bazarant vikrek dhaddta, tem hatacho vapor korinastanam potiyamni bhortat, ani tacher dotoranchi koddok dek-rekh asta. Zanv sthanik vo bhair thavn yevpi dud jem ‘Goa Dairy’ gheta tem puray bhorvanxachem, oxi khatri Xri Kulkarnin V. Ixttachea potrkarak dili.
Tor bhesoll ani borem dud hem parkhop koxem? Oso proxn V. Ixttan hea odhikareak kelo, tednam tannem sanglem ki, potiyamni vo mekllem poryan aslelem bhesoll kelolem dudu ek pavtt ghorant haddtoch tem don voram bhitor ibadd zata. ‘Untouched’ dud jem odhikrut komponeo vo songhottnna utpadon korta tem 8 tim 10 voram meren kainch zainastanam urta. He gozalichi khatri zonn eklean korop gorjechem, oxem Xri Kulkarnin sanglem.
Hem dud bhesoll korunk te-te dudkar tore-toreche addeche upay vapurtat. Tea dudak dattai (thickness) haddpak tantunt pitto ghaltat. Dudak chorbi haddunk tantunt vonospati misoll kortat. ‘Unhygienic’ pod’dotin dudacho vevhar kortat ani lok duensank sampoddtat, oso khulaso Xri S.K.Kulkarnin V. Ixtta kodde uloitanam kelo.Dud bhesoll korpachim prokornnam Gõychea mukhel xarantlean zatat. Gõyam bhaile ani khas korun UP rajyeantle 'Bhaiy'ya' somazantlo lok chodd kortat. Te bhailea rajeantlean chodda promannan dud Gõyant haddtat ani mellot te porim tem potiyamni bhorun lokak vikrek dovortat. Hem nhoi fokot xaramni, punn ganvamni ani kheddeamni poryan hem bhorpur ghoddta oxem khatren Xri Kulkarnin V. Ixttak sanglem.
Dor disa jitlem dud Gõyant utpon’n zata, tem Gõychea lokak pavona, taka lagun bhair thavn yetolea dudacher tharun ravchem poddta. Hem bhailem dud ‘Goa Dairy’ gheta tacher puray toren topasnni zata mhonn khatren Xri Kulkarnin V. Ixttak sanglem.
Gõychea ‘Animal Husbandry’ khateacho Dr. Savio Vaz-an V. Ixttak mahiti dilea tea pormannem, Gõyam bhaileo komponeo Gõyant dudachi purvonn kortat, tantlea 13 komponeanchi kaidexir nondnni korunk sorkar yevjita.
Hi kaidean nondnni kelea uprant tanche koddlean yetolea dudacher koddok dek-rekh asteli ani lokak borea dudachi purvon zatoli oxem Dr. Savion V. Ixttak sanglem. Sorkaran he gozalicher apli koddok nodor dovrunk zai. FDA khatean hea addechea magran choltelea kamancher lokx ghalun koddok karvai korunk zai. Tednach ki he gozalicher niyontronn yevpak xokta oxem Xri Kulkarnin fuddem sanglem.