Ponnje: Gõychea Igorzanchea vavracho attap 'Right to Information Act'-a khal haddum yeta? Sorkar mhonnta ho proxn sod'deak tanchea odhikara bhair asa, karonn Vatikan zaun asa ek des aslolean tanchea sonvsthanchem 'record' loka mukhar ugtem dovortat kai na  tachi khobor na.
Eka vidhi mondollachea pongddan rajyachea kaidya khatea kodde obheas korun polleunk Gõychea Daman ani Diuchea Arsebispachi kocheri RTI kaidea khal 15 disam bhitor haddunk zata zalear maglam. Tea khatean borovn dil'le aplea  zababan mhonnlam, Vatikan ek des mhonn mandun ghetlolo asa ani Pap Saib tacho mukheli oxem zal'lean tancheo sonvstha asat tankam tanche 'records' loka mukhar dakoll korunk koxem sangunk zata tachi khobor na.
Vidimondollachea kaideacher asloli adhoc somiticho odheokx BJP-cho amdar Xri Francis D'Souza-n ho prostav chalu aslole  Vidhan Sobhent Somaradis mandlo.
D'Souza-che mukhelponna khal aslole he somiticho nirnnoy kaidea khatean tacher ek khor obheas korcho ani tacho 15 disam bhitor tacho vako dhaddcho mhonn  nirnnoy Antonio Michelle Abel-an kel'le suchovnnek lagun zala.
Abel mhonnta tea pormannem  rajyo kaidea khatem ani niti sobha RTI kaidea khal yeta tednam Arsebispachi karyalay hea kaidea khal yeunchi oxem tichi sangnni.
Gõy, Daman ani Diu Arkidiosezicho Arsebisp Filipe Neri Ferrao-n Igorjechea kaidea khal ek  bhovxik mahiti kocheri ugti korchi ani RTI khal ailolea orjank tannem zab diunchi oxem Abelan aple suchovnnent mhonnlam.
Abelan kel'lea suchounnen vidimondollak kollit kelam Arsebispache kocherint itlim vorsam meren Gõychi Purtugez sorkara kodlean Gõychi suttka zalea mhonn Pap Saibak azunui kollonk na. Gõy Portugesa koddlean 1961 vorsa svotontr zalem mhonn khobor Pap Saibak na oxem tichem sangnnem. Gõy, Daman, Diu Arkidiosejichea Arsebispan Portugezanchi Ghottna, kaide, chal, sonskruti ani porompora kaddun uddounk zai ani Pap Saibak kollit korunk zai Bharotache kaide, chali, sonskruti ani porompora khal yeunk Gõychi Igorz jivi urpak oxem Abelan mhonnlam.
Gõyant sod'deak 30 tok'ke Kristanv asat ani tantle chodd Katolk je Gõy Daman ani Diu Arsebispa khal asat.