IFFI  2010, ho Ontor'raxttrik Film Ustov Gõyant  zata mhunn amkam soglleank obhiman bhogta. Novembrachea nimannea satollean thaun  veglloch boball suru zata. Eke vatten veg-vegllea  desanchim cholchitram polleun amkam tea desachi sonskrutay toxench adhunik avhanam disun yetat.  He cholchitranche  ghoddnnar ani tanche sangati  uloitana cholchitranchi somzonni amkam khollayen mellta.
Filmi kolakarank polleunk ami sodanch axetanv. Tanchea don mannkullea utrank axetanv Punn zaite pavtti tim fokot  murgottun,  fottu kaddunk mat ubim ravlolim amkam distat. Tori astana tim hea film utsovak sobay haddtat.
Thoddo  boball amkam obhiman haddta zalear  thoddo boball amkam chintunk laita.
Poilem chintop mhunnlear, Konknni Cholchitr -  hea vorsa - O Marie- ekuch aslem. Oxem kiteak  ghoddlem, Moratthi cholchitram kitlinch dakoilim ani ami pollelim. Konknni cholchitrak sfurti ani amchi sonskrutay polleunk ami ravtanv. Fuddle  IFFI utsovak kitlim Konknni   panch  tori cholchitram astolim kai?
Durse mhunnlear  hea choddxea cholchitramni magnneacho ek kherit vixoy aslo. Odik korun Kristi magnnem. Khorench, zaitem  bodol'lam  koxem oxem amkam dista punn  sadea magnneache dekhave azun  cholchitrak sobay haddtat. Magnnem amchea jivitak  sobay haddta tacho  orth onbhovleant tinch sangtolim. Asa kay amkam vell aikunk? IFFI  gelear cholchitram  vorvim ho sondex  polleunk melltat.
Tirse suvater, Gõychea Saibachim novenam ani IFFI-cho utsov ekach vellar  yeta. Ek dhormik somarombhnni  zalear  dusri odik moujen bhorloli. IFFI utsov bodlun Dezembrachea  durea satollean haddunk kiteak amche talle ugte zainant tem polleunk vichitr dista.  Ek pavtt zal'lem tem zalem, tem amchean bodlunk zainam, oslea vicharachem gulam' ami zaleanv kay? Vo Delhiche odhikari  sangtat toxench ami korunk lagleanv zalear Gõy Delhichi koloni zaunk kitem unnem  asa?
IFFI-chea boballan  osle boball  liptat?  Atam vachun faido koslo. Asa zalear…