Ponnje: Bharotantlim 16 milhanv supurlim bhurgim iskolak vochonant, ponn ghoravi vavr (domestic work) korun aple dis sartat mhonn dixtti poddta. Oslem chitr nodrek distana, 'Smile Foundation' he bin sorkari songhottna (NGO) lhan bhurgeank tanche hok'k diunk ek cholchitr toyar kelem. Filmachea madhyomantlean bhurgeanche 'right to education' hok'k loka mukhar haddunk tannim vavr kela. Ho tancho proytn sufoll zatolo mhonn 'I am Kalam'-cho digdorspi Nila Madhab Panda-k dista.
Hea cholchitrant Bollywood-acho kolakar Gulshan Grover-an kam kelam.
Konnachea-i monant yex mellun ghevpacho haves asot zalear ani to mellun gheunk tache thaim xeokti aslear, zoit sompeponnim tachem zaum ieta mhonn tea cholchitrant dakhoilam. Bharotacho adlo raxttrpoti A P J Abdul Kalam-achim utram eka ganvchea sadhea bhurgeak koxim prerna zata, tem tea cholchitrant polleonk mellta.
 'Chotu' ek gorib bhurgo. Tachi avoi Bhati rinnant bhuddloli asta. Putak vaurak dovorlear, sogllim rinnam somptolim mhonn ek dhoni Chotu-che avoik sangta. Chotu-chea monant 'shirt' ani 'tie' marun, ek  vhodd monis zaupachim sopnam astat.
Tea dhonia-k vavurtana, Chotu-k chodd tras poddonant, ponn 'Lapan' hea dusrea eka vavurpea udexim taka zaitench sonschem poddta. Tacho sogllo vaur Chotuk korcho.
Ek dis TV polletana, Chotu-k A P J Abdul Kalam dixtti poddta ani tachea jivitachem rupantor zata. Hem rupantor koxem ghoddon ieta, tem tea cholchitrant bhes bore ritin dakhoilolem asa.
 Hea cholchitrant Chotu-chem sovong Harsh Mayar-an kelam. Toxench, Frans desantli Beatrice Ordeix-an eke videxi ostorechi bhumika kelea. Hea cholchitrant nhoinch fokot xikxonnacher bhor ghatlolo mellta, ponn odhik korun 'child labour' ho mud'do favo te ritin nodre mukhar haddla. Hea cholchitrantlean 'Smile Foundation'-ak sufolay mellot zalear, fuddarak anink cholchitram uzvaddak haddtolim mhonn digdorspean sanglem.