Novi Delhi: Bharotantlea zaitea rajeamni konversanvam vo dhormontoram add kaide keleat te mull hok'kank okmanaitat ani soglleancho abru favo zal'lea desachea dhormatit vo sekular pod'doti nakartat. Aplo dhorm bodlun apnnak khuxi to dhorm apnnavunk dor eklea mon'xak  Ghottnen hok'k  dil'lo asa, oxem dalitanchea kendracho sonchalok James Masey-n sanglem.
Halinchea vorsamni zaitea rajyamni konversanvam add Vidhan Sobhamni billan pas korun ghetleant. Kaim mon'xamni apkhuxen Kristi ani muslim dhorm apnnaila tancher mullvadeamni vhoddlo nixed marla. He vixim dhormanchea fuddareamni don dis boska gheun hea proxnacher bhasabhas kelea. Bharotantlea Igorzanchea raxttrik mondollan hi boska ghoddun haddloli. Protestant ani Orthodox Igorzamni tantun vantto ghetlo. Hindu, Muslim ani Kristanv lokui he boskek hajir asle.
Bharotachea 1.15 bilhanv loka modle 80% lok Hindu dhormancho, 13% Muslim zalear fokot 2% Bharoti Kristanv asat. Tori astana Bharotachea kaim ganvamni lokak bollan Kristanv kortat mhonn Kristanvancher mullvadi bogllanttam ghaltat, odik korun Karnatakant ani Orissant Kristanvank chodd dhumallo  ditat.
Sod'dea Arunachal Pradesh, Chhattishgarh, Gujarat, Himachal Pradesh, Madhya Pradesh, Orissa ani Rajasthan hea rajyamni konversanvam add kaide keleat. Hea kaidea pormannem konverter zaunk addvarlam ani zo monis sorkarachi porvangi ghenastana dusrea dhormant bhitor sorta taka kaidean  khast favo zata.
Osle kaide mon'xache sot'techer add vetat, dekun te kaide sogllea bollan nakarunk zai, oxem Arunachal Pradeshantlo Hilli Likhan sangta. Atanchea Bharotant kaideank zago na mhonn sangun NCCI somitichea karbhari chitins Solomon Rongpin-an khont ugtailea. Ami nagri somaz zal'lean Bharotantlea sabar dhormam modem jiyeunk toyar asunk goroz. Heach pasot sogllea dhormam modem sonvad korpachi goroz asa mhonn tannem sanglem.