Ekdam sorgvaxi Baba Amtte xarantlea rostea velean cholun vetalo. Rosteache kuxik tannem ek bhikari pollelo. To khup mhello aslo ani taka vas martalo. Taka pollena fuddem  Baba Amtten mhollem: Xi! vas marta tuka." Matso fuddem gelea uprant to thamblo. "To mhozo bapui zal'lo zalear?" "To mhozo bhav zal'lo zalear?" oslea prosnancher prosn to korunk laglo. Hea prosnamni tachem mon osthir zalem. To fattim porot gelo ani tea bhikareak tannim aplea ghora vhelo, punn tachea bapain taka bhitor ghetlo na. Osle poristhitint to ghuspolo. Tannim taka eke eksure suvater vhorun tachi seva keli.  Aiz thoim ek vhodd 'ashram'  ubem asa. Tacho put tem 'ashram' choloita.
 *Punentlea JDVint xikpi kaim yadnikamni Ut'tor Bharotantlea 'boarding'-ak bhett kel'li. Bhurgim suttiyent ghora vochpachi toyari kortalim. Kaim bhurgim jevta thoinch axil'lim. Kaim bhurgim jevonn potiyent ghaltalim tim tea yadnikamni pollelem. " Hem jevonn tumi kiteak potiyent ghaltat?" eklea yadnikan vicharlem. "Amkam hanga disan-dis jevonn melltta. Amchim bhav-bhoinnim ghora asat, tankam disak ek jevonn mellunk kotthinn zata," tannim zap dili.
Amchea somazant dusreancho husko dhorun jiyevpi zaitim asat. Torui astana, "Mhaka kiteak poddlam?" mhonnpachi vrut'ti (attitude) apli man  vhoir kaddtta.  "Mhoje lagim zaitem asa ani thoddem mhaka goroz na mhonnttoch dusreank dium-ia," osle poristhitint amche modlim jiyeunk lagleat. Dusream sovem udar zalear mhaka kitem faido zatolo, hacherui aiz vichar chol'la. Hi  poristhiti mat fuddaracho bhoy nirmann korta.
Voilim don ghodditam, dusream sovem udar zal'leacho dekhavo dolleam mukhar haddtta. Zaite favtti dusream sovem udar zaunk ami amchea monak proxikxonn (training) ditat.  Khup bori gozal. Dusream sovem amcho husko jivo zata. Punn kaim favtti ud'desh mat vegllench rup gheta. 'Zo konn mhojem boreponn gaita, tache sovem hanvem boreponn gaunchem' hem totv amchea monant rigla kai dista. To mhozo lagsorlo vo soiro, taka  hanvem adhar diunkuch zai nhoi? hem monant haddun dusream sovem udar zaunchi palli amcher yeta mhollear lottkem zaunchem na.
Dusre votten ami amchech sovem udar zalear borem, hemvui amchem monisponn sangta. Amchea noitik (moral), xoririk (physical) ani otmik (spiritual) jinnyent udarponnachi goroz asa. Amchech sovem udarponn dakhovop mhollear ami apsvarthi zavop nhoi. Jinnechea veg-vegllea ghottokam kodden udar zavop mhollear, amchech jinnent bhitor sorun, amche jinnechem atmnirikxonn (introspection) zavop xanneponnachem.