Ponnje: Fattlea tin vorsanchea kallant Gõyant zoxe khun, bolatkar, vikh ghevop, vikhallea vokhdancho vapor adi, he toreche 898 guneanvanchea 'Forensic' avhala khatir, Gõychea pulis khateak Gõy bhailea 'Forensic Laboratory'-cher atthapun ravchem poddlem oxem sorkari sutram koddlean spoxtt zalam.
Gõyant hi proyog xalla (forensic lab) azun porian ti cholona. Taka lagun, lagu zatelea kexinche avhal (reports) ghevpa khatir, soglleo kexi Gujaratantlea Surat hanga aslole proyogxallent dhaddcheo poddtat. Hi ekuch proyogxalla Gõychim prokornnam hatallta mhonn pulis odhikariean sanglem.
Hi proyogxalla suru korpak kendr sorkar 8 krutt rupiya monzur korta. Hea duddvam udexim te proyogxallent goroz toslim veg-vegllim mixinam, kamdar ani her khorch bagovpacho poddta. Gõyant he proyogxallechi imarot toyar asa ani he viximcho prostav Gõychea sorkaran kendr sorkarak dila, torui he proyoxallechi imarot Verna hangasor toyar asun poryan vaprinastanam  asa, hi ek ojap korpa sarki gozal.
Gõychea veg-vegllea vibhagamni IPA 302, 307, 376, 326, 328, 354 sarke guneanv zaleat ani he kexincho sodpus korpak Gõyche pulisek avhal ghevnk Surat vechem poddta. Heo choddxeo kexi Ponnje, Vasku, Moddganv, ani her kinare vattharamni ghoddleat. Hantunt choddso vikhallea vokhtancho som'bondh asa oxem eklo unchlo pulis odhikari sangta. He proyogxallentlean avhal mellunk boroch uxir zata mhonn to sangta,  taka lagun topasnni korunk tore-torecheo addkolleo yetat.
'Forensic Lab'-ak lagun Gõychea pulisechea sodpus vavrak khupuch oddchonneo yetat, hi gozal atam lipun urunkna. Porvore 'Finger Prints Beaureau' (Bottanchi nixanni ghevpacho vibhag) asa tachi poryan poristhiti toxich asa. Hangasor zannkar ani sodpus (research) korpi kamdar naslelean, mhotvache zage rikami asat. Haka lagun hea khateant khupxeo kexi poddon urleat. Pulisanchea topasnnechea kamant khup addkolleo uprasleat oso anik eklo unchlo pulis odhikari sangta.
Sabar torechea guneanvanchi sodpus korpa khatir, hata bottancheo ani her kuddichea bhaganchea nixanneacher atthapun ravchem poddta. 'Scene of Crime Report' hache vorvim sodpus korpi pulis toyar kortat. Hata-payancheo nixanneo toxench her kuddinchea bhagancher mell'lolea nixanneacher pulisancho sodpus tharlolo asta. Porvore 2001 vorsa 'Finger Prints Beaurau' ugoddlolo, punn hea zagear koslench kam' zaina. Hachem karann mhonnlear hangasor goroz ani yogeotayeche kamdar nant mhonn gomlam.
Pulisanchea vorixtt odhikareamni hea vixim kitlech pavtti apleo magnneo keleot, punn sogllem bherea kanar poddlam. Guneanvanchea sodpus vavrak pulise mukhar khup tras uprastat. Kitlech pavtti eka guneanvkarache  favo te purave dakoll zavnk naslolean kaim asol kirmidor poryan  sutt'tat, oxem anik eklo unchlo pulis odhikari uloitanam mhonnunk  laglo.
Ek nivrut (retired) zal'lo odhikari sangta tea pormannem, 'Forensic Lab' ani Finger Prints Beaureu' heo donui vostu zata title vegim chalu korpachi goroz asa. Hea mhotvachea gozalincher sorkaran durlokx korunk favonam. Gõyant heo vostu chodd  mhotvacheo mhonn tannem sanglem.