Thodde dis patthim hanv Konknni cholchitr, 'O Maria' polleunk gelom. Tem polleun hanv dadoxi ghora portolom. Ponn cholchitr polleun bhair sortana eke zantte bailen tea cholchitrachim fokannam kelim oxem mhonnun, "Ami 70 rupiamni tiatr polletanv te kai bore ani 3 horamchem hanga hem film 2 horamni kobar zalem ani tikett 100 rupia."
Tichem aikun hanv bhitorlea bhitor boroch hanslom. Koslim pixim him Goenkaram (ani oxi ulovpi bail Kristanv asli) jim amche Konknni maim bhaxechi suropai uklun dovrunk nokllo! Te zantt'telek apnnak nhesonk dubhavavinn boreo-boreo saddeo zai, Konknni maim bhaxechi Konknni cholchitram anink eke bhaxechi saddi mhonn ti visorli. Kitle-i tiatr zale zalearui, 'O Maria' oslim cholchitram gorjechim Konknni bhaxecho man uklun dovrunk.
Korta tea vaura khatir Rajendra Talak bab-ak khorench xabaski favo. Tannem hem Konknni cholchitr, 'O Maria' rochlam ani digdorxilam. Taka xabaski favo karonn tannem hea cholchitran Konknni ani Inglez bhas toxich Hindi ani Gujaratti bhaso bore bhaxen misoll keleat. Oxem korun Konknni bhaxek lagon zo vad Konknni bhokt kortat tachim eke bhaxen tannem fokannam keleant. Lok uloita ti bhas, nhoi aplea offisamni boson apnnakuch pandit korun oxich bhas zaumchi mhonn formaitat ti bhas.
Konknni bhas sadhea lokamni jivi dovorlea nhoi toslea panditamni. Az sogott obhimanan Konknni ulounk sodta, tem hea cholchitran polleun khuxalkai bhogli. Tea cholchitrant kolakoram vinchun kaddleant tim ap-aple bhumikek sarkhim bostat. Hea cholchitrant konnem sogllea von borem kam kelam tem sangonk ekdom avgodd.
Mhaka zalear sogllinch 'hero-heroine' koxim dislim. Oxem tiatramni polleunk mellona. Dusre mhollear hea cholchitran kainch lambhounk na. Hindi serial T.V.-cher lambhoitat te bhaxen vo Hindi cholchitram lambhoitat tem hea cholchitran disona.
Khorem Goenkarponn ek Goenkar nhoi to dakoita tem polleun mhaka mhojich loz disli. Hanv Goenkar zaun mhoji chal kosli zalea tem polleunk hanv ghora ieun chintunk boslom. Ontoskornnachi chovkoxi korunk ani hanv Goenkar mhonn xat'ti dhaddaita tor hem Goenkarponn kiteant asa tem hanv polleunk boslom.
Hea cholchitran kainch pozddim fokan'nam nant, tem mhaka ekdomuch avoddlem. Kormonnuk asonk  pozddea fokan'namchi goroz na mhonn tem cholchitr dakhoita. Fuddari nhoi aponn zhutti choloita to, ponn podvi nastana zagrutai haddta to.
Aplo faido nhoi, bogor apleak luskonn zata tem legun sonsun vhorta to. Hem tea cholchitran Mike-achem svong kortolea sovem disun ieta. Konknni maichea nanvan fuddariponn choloun aplo faido polletoleank to sondex mellcho. Toxench aam aadmi mhonnonn apnnacho faido polleun Goem luttoitat tea fuddearamni Mike-achi dekh gheumchi.
Xevottak sangchem mhollear 'O Maria' cholchitrak amchi soglleamchi xabaski asum!