"Bhroxttachar" hem kaim kalla  poilim aikunk naslolem utor. 'Bhroxttachar' hem utor amchea somazant vostolea fottikirea ani nagovnneank bott dakhoita. Noitik bhroxttachar, bhoutik bhroxttacharak pavoita. Zoxim noitik mul'lyam bigddot vetat, toxi amchi chal bigddot ravta. Hi chal, mon'xall, ghorabeachea ani somajik totvanchi vatt laita. Hea noitik totvanchem unnakponn, odhaxiponnak, fottingponnak ani bhoutikponnak pavoita. Nhoikari totvank bodol'loli vrut'ti oxem-i  mhonntat ani amche chalint bodol ghoddounk, he vrut'tent kitem tori asa.
Amchim noitik, somajik ani somudaik totvam, portun anik ek pautti xikunk, kallav zaunk na. Punn tim amcheamni zantteam ani tornatteam vorvim portun vistarum yetat. Ami zanttim/tornattim koxim amkam borem ontoskornn asa kai na, hachi zann gheupa khatir, ami amchea fattle chalicher nodor martolim tednach bhroxttachara add amchem zhuz suru zatolem. Fokot borea ontoskornnachim mon'xam sotacho valor kortolim. Soglle torecho bhroxttachar zaum noitik vo bhoutik, amchea kallzant axil'lea fotti velean suru zata. Apleponn vo hanvponn amkam bhroxtt korta. Him mon'xall totvam amche fuddle pillgek pavoiteleanv zalear ami sogllea avoi-bapaink, zanteank, tornatteank, xikxokank, dhondekarank, ani fuddareank, noitik gyanache karyakrom, ghoddounk goroz asa. Mon'xacho dorzo rakhunk dovorpachea hetunuch, hem sogllem kortat. Ami amcheach bore dekhin, zor amche fuddle pillgek, borim mul'lyeam ani somajik totvam xikoilim zalear, amcho mon'xancho dorzo samballunk ami pavtoleanv. Hech toren noitik ani bhoutik bhroxttachar yetolea vorsamni unno zatolo. Amche modle thodde, zori tem polleunk pavchenant. Tori astanam bhroxttachara add amchem zhuz chaluch urunk zai ani choddan chodd lokan hea bhroxttachara add zhuzpachea zhuzant vanttekar zaunk zai. Ami khuxal jivit jiyeunk sotachim ani promannikponnachim mon'xam zaunk zai.