LOTTLE: Sonvsarbhor fanki vyanchitrkar (cartoonist) Mario Miranda, Dezembrache 11ver Aitaradis sokallim 4 vaztam,Lottle  tachea purvozanchea ghorant 85 vorsanche pirayer ontorlo.  "Nidentuch xant soimbik morn taka favlem", oxem tachea ghorcheamni khobor dili. Adlea disa to bholayken boro aslo. Aitaradis eke partyek vochpachi tachi khuxi asli mhonn tim sangtat. 20 vorsam odik Gõykaranchea jivitacher Mario Miranda chitram (vignettes) chitravun boroch nanv lovkik zalo.
Tachea vyangchitranche vegllech kolek lagun taka 2002 vorsa Padma Bhushan ani 1998 vorsa Padma Shri he raxttrik Puroskar favo zale.
12ver sokallim Lottleche Igorjent tachea morna vidi zali. Pri. Bolmax Pereira Lottlechea Padr Kuran Mis bhettoilem ani Pri Rumualdo de Souza, sj hannem provochon  kelem ani amchea ganvak favo zalolea hea tejvont ani huxar gunnak lagun ami Devak dhin'vasunk favo. Hea dennea khatir Mario sodanch omor urtolo. Heach pasot to Gõyant yeun ravlo mhonn tannem sanglem.
Gõychea sonskrutayechea chitramni durboll somazancher, zatincher, bhozankolecher (gastronomy) ani kolevont vostumni  tannem xrungaileot, tantuntlea tantunt padrinkui to attapunk visorlona, oxem Pri Ivo Conceicao de Souzan sanglem.
 Misa uprant tachi kudd Pajifond Moddganv Hindu "Crematorium" zagear vhorun tache khuxi pallunk ujea-svadhin keli ani Gõycho fanki put unchlea kolponamni bhorlolo Cartoonist Mario omor zalo.
 Mario Miranda Mayache 2rer, 1926 vorsa Damanv zolmolo. Bengllurche St Joseph Iskolant tannem xikop korun Mumbai St Xavier kolejint, Itihas vixoyant BA keli.
1953 vorsa, Times of India disalleant tannem cartoon vo vyangchitram kaddpachem kam' kelem. Thoddea kalla modem 'Fine Art' xikunk gelo. Miss  Fonseca ani Miss Nimbupani chitram vorvim tachem nanv gazlem. Ani Femina, Economic Times ani Weekly of India hea nemalleancher tachim vyangchitram yetalim.
Times of India disalleak vavurtana Mirandak fanki `cartoonist' R K Laxman borobor vavrunk sondhi mell'li. Hache bhair Mohan Malgaonkar hache 'Inside Goa' ani Dom Morares hachem A Family in Goa ani The Open Eyes' hea pustokant tache cartoon uzvaddailet. Toxench tannem uzvaddail'lim pustokam, Goa with Love, A Little World of Humor, Sketch book, Germany in Wintertime, Impression in Paris ani Mario de Miranda hantunt cartoon asat.
Tachea veyangchitranchem Amerikent, Japanant, Brazilant, Australient, Singapore, Frans, Yugoslavia, Portugal hea desam soit 22 desamni prodorxonnam zalim. Taka zaite ontor'raxttrik puroskar favo zaleat.  Halinchea vorsamni Katolk padrinkui tache kartoon avoddtale, oxem Arkitekt Gerard D'Cunhan sanglem. Monam hanspachi prerna ditolean aiz dukhin zomlolea xembhoreamni lokachea dolle dukhamni bhorle. Zannem aplea  chitramni Gõy xrungailem
Vauraddeancho Ixtt satollem taka xrod'dhanjoli vompun tacho bhovman korta ani tache ghorkarnn Xmti Habiba Miranda-k toxench tachea putank Raul ani Rishaad hankam buzvonn dita.