Ek zannar oso vichar korta:Devan tuka aicho dis dila; hea disak 86.hozar odik segund(seconds) asat; Ixtta! Kitle pavtti tum Devak ani tujea sangteank Dev borem korum mhonnttai? Chodd kalliz movallteli  gozal David Paxaichi: Devan denneam-upkarancho xinvor tacher rokoilo ani khoxechea umalleamni to gavunk laglo “Hanv Devak vakhanntolom ani dhin’vaxi kallzan Tachi mhoima gazoitolom” Vhodde khoxalkayechea umalleamni to bhorlolo ani tacho khoxecho khotkoto sanvronam zalo.Tor sobhemazar uddkeo marun nachunk laglo ani aplo dhin’vas ani sontos sobhemazar tannem porgottlo. Konn-konn taka hanslo, thoddeamni taka pixant  kaddlo. Tannem porva kelinam. Tachem kalliz sanvronaslem,umalleamni khotkhot’telem kalliz Dhoniak vakhanntalem. Khorench, tunvem ani hanvem zaitem ghetlam. Bapan amkam khub khub dilam.Ponn onek pavtt dil’lea khatir argam diunknam, portem, nam tem chintun kitlo xinnlam. Hoi,hanv polasint ravona, bhangra khattir nidonam,mottim jevnnam jevinam,ponn dispottim kitem tori hanv gheit asam. Juhu Tara amche Holy Cross Igorjent sevek ek adhivasi bhav asa. To matr zaitench amkam xikoita. Kitlo nitoll ani dhin’vaxi to. Godd zap ani hanso tachea mukhamollar. Manuchi choli viz poddon khinnek meli.Tich tanger bori zoddtali.Taka bhett korun buzvvonn dilear, him utram aikun hanv ojaplom: Fadar! Devan dilem Tannench tem vhelem.Tache khoxek man bagaitam. Anik thoddeam vorsamni tacho put Mumboi kam’ kortalo, khub danddgo sorlo. Ozun tache thaim tich xantikai ani Devak dhin’vasponn ami pollelem. Bhag. Paulu Tesalonikarank xiddkaitalo: “Sodanch khoxal ravat.Thambonastana magnnem korat. Zata tem zaum sodanch argam diat”. Vhodd subhagi monis zo dukha sukhant khoxen Bapak argam ditolo. Povitr Pustok Stotr 9 amkam xikoita:Sogllea mhojea kallzan Dhoniak vakhanntolom. Tannem kel’lim ojapam  khoxen porgott’tolom. Zaitim vorsam fattim Jerman desant vetalom. Kitem mhonnchem, koxem ulounchem tem eke madri lagim budh magli. Tinnem mhaka  suchoilem: Donuch utram puro-DANKESCHON-BITTESCHON” (Thank you and please). Vhodd zannar monis Meister Eckart budh dita: “If the only prayer you said in your whole life was “THANK YOU”, that would suffice. (Ak’khea tujea jivitant Dhonia argam Tuka, itlench magnnem kel’lem, tench puro zatem.”)