Bharotachea sorkaran Janerache 24ver, Cheddum Ballkacho Raxttrik Dis jahir kela. Ceddvancher kitlech toreche ot'teachar zatat ani tanche hok'k tankam mellonant. Cheddum bhurgeancher zatolem noxtt pois korpache upay gheunchi goroz asa, oxem Jivita khatir Pontifikal Akademicho vangddi Dr. Pascoal Carvalho sangta. Tache sangnne pormannem sov vorsanche pirayek pavche adim 13 cheddvam modlem ek cheddum morun veta. Atanchea kallar kusveantlea cheddum ballkacho gorbpath kortat tem vattavunk zai mhonn Dr. Carvalho spoxtt kelam. 2009 vorsa United Progressive Alliance sorkaran ho dis cheddum ballkank bhettoila. Ponn 1966 vorsa Indira Gandhi Bharotachi poili ostori Prodhan Montri zali tea disachea ugddasak ho dis kuxin dovorla. Dor vorsa Povitr Sobha Setembrache 8ver, Ankvar Mariechea zolmacho dis somarombhta. Adhunik kallar ultrasound ani amniocentesis hache sarkhea upayam vorvim hozaramni cheddvam bhurgim hea sonvsaracho uzvadd polleunk pavonant. Hea yontramcho upeg korun avoy-bapuy kusveantlea ballkachem ling cheddo vo cheddum zolmlam tem polletat . Ani kusveant aslolem bhurgem cheddum mhonn gomlear tacho gorbhpat kortat, oxem Mumboiche Arkdiosezichea Human Life Mondollacho vangddi Dr. Carvalho-n sanglam. Hea noxttacher niyontronn dovrunk vo nopoit korunk sorkaran 'Prenatal Diagnostic Technologies Act pas kel'lo asa. Tea pormannem ho guneanv adartolea avoy-bapayank ani dotorank legit khast diunk formailea. Tori astana kitlinch avoy-bapuy ani voiz hea kaidea add gel'lim melltat. Nhoich fokot cheddvancher yetolea khorchak lagun ponn tore-torechea vicharank lagun cheddvank soschem poddta. Cheddvam zolmolear tanchi pillgi fuddem vochona, zantteaponnar cheddvam avoy-bapaycho samball korunk pavonant toxench cheddvank ghorant konnui melear tankam mornnachi vidi korunk hok'k na. Hea ani oslea torenchea vicharanchi aiz cheddvam bolli zatat. Bharot desant aiz kitleach familimni cheddvam bhurgeancho ankddo unno zaunk lagla. Jea familimni cheddvam asat tankam mansik vatten zaitem soschem poddta. Cheddum ballkancher zal'lea mornna vixim topasnni korunk Central Supervisory Board-an kaido vevharant haddla. Aiz meren hea kaidea khal 94 dotorank kheast favo zalea ani Medical Council of India hea mondollan 15 voizanchem lisens rod'dh kelam. Hea vaddtea ot'teacharancher ani linga modlea bhed-bhavancher Katolk Igorz nixed marta. Cheddvanche hok'k ani tankam surokxa diunk 2010 vorsa Bharoti Katolk Bispachea Mondollan cheddvam khatir veg-veglleo karyavolleo, hospitalamni, zantteanchea ghoramni, dispensarimni ani dotorniche klasint cheddvank favo to dorzo diunk tozvit kelea.