Ek Sfurthi: Sachin Tendulkaran xemboravo xekddo marlea uprant, NDTV-chea batmidaram lagim uloytana sopnam vixim aplem mot manddlem. 'Dor eka mon'xam sopnam sopneunk zai. Kiteak sopnam sopnetolea mon'xak tim ek dis sakar zatat. Vixv kop jhikunk mhojem sopon aslem. Tem sakar zaunk mhaka vis vorsam laglim'. Choddxim mon'xam fuddara vixim ek sopon gheun astat. Punn zaite pavtti tanchim sopnam sakar zaunche boldek pisddun vetat. Dekhik, ek xikpi bhurgo dotor zaupachem sopon aplea dolleam mukhar dovrun xikta. Punn taka porikxek goroz title gunn poddonant ani he toren taka 'medical college-int' proves mellona zaun tachem sopon pisoddta; avoi-bapui aplea bhurgeam vixim khub sopnetat. Punn tanchim bhurgim tanchea sopnancho churo korun soddtat. Oslea pisddun gelolea sopnak lagun zaiteanchem jivit niraxiponnan sarpachem zata. Toxench, zaitim zannam aplea pisddun gel'lea sopnancher zoit melloun zaitem borem korun dakhoitat. Eke tornatte choliek bollan xindulkechea vavrak ghali ani tichim sopnam pisuddlim. Atam he cholien aplea bhuzancher ek misanv ghetlam. Ani tem mhollear, xindulke vavrant ghuspol'leank ti adar diun tankam hea dhondeantlim soddoita. 
Devachem Utor:  Dhormdutanchea Itihasantlea vachpant, Pedru tea opangull mon'xak pekovnni dita. Jezu vixim xisanchea monant ek chintop aslem. Jezuchea mornnan sogllem fiskottun veta. Jezuchem xubhvortoman porgottunk te akhea sonvsarak te toyar astat. Punn xisank khub addkholli melltat ani tanchem sopon viron veta koxem tankam dislam zait! Tannim Devacher khol bhavarth thevlolo dekhun tanchim pisoddlolim sopnam vorvim, tankam ek novi dixa mellta (poilem vachop). Aplem sopon sakar korunk thir aslolo monis Devacheo adnia samballunk ekdom' huxar asat. Kiteak Devachem Utor pallta to visvaxi mhonn tharta. Oso nirop Sant Juanv aichea dusrea vachpant dita. Zalear xubhvortoman, jivontponna uprant Jezuchem asnnem xisank ghottai ditam ani he toren aplim sopnam te sakar korunk pavtat.
Amchea Jivitak: Pisoddlolea sopnancho onnbhov xisank bhorpur asa. Aplim sopnam pisoddlim mhonn somzun te aplea adlea vavrak vochunk kortat. Jezu mhollear sonvsari razam porim Aplem raj sthaptolo mhonn te chint'tale punn Jezu khursacher mortoch tanchim sogllim sopnam virgollon gelim koxem zalem. Magir Jezu Apunn tankam dixti poddta ani ghottai dita. Jezuchem asvason gheun te jivitak nove dixen polletat ani yesesvi zatat. Khursar khillaylolea Kristak lagun zori xisanchim sopnam pisddon vetat zalear Punorjivont Kristacher nodor ghalun aplim sopnam te yesesvi korunk pavtat. Amchem jivit sopnanim revoddlolem astat. Zaitea karonnak lagon amchim sopnam pisddun vetat tem ekdom' sobhavik! Tori aichea sevadhormant amkam ek bhorvanxachem kirnn polleunk mellta tem xisanchea jivitant. Punorjivont Jezuk amchea akhea jivitacho maz korun orthabhoritponnim jiyeunk vavrum-ia.