 "Porot mhojea payancher ubho asam, Devak ditam argham….Mhoje avoikui chodd dhin'vastam"…Yuvraj Singh krikett yugantlo ostad khellpi sov mhoine aple kankrache piddek ilaz ghevun Delhik ailea uprant potrkaram lagim uloitalo.
Jerul vhoddantlo vhodd khellpi to, HERO Bharatacho 2000 vorsa legun to porzollunk laglo.World CUP 2007 jikunk tacho mozbut tenko mell'lo.Ek pavtt eke danvddent ekar-ek sov souke (sixers) marun Stuart Board hea inglez khellgoddeak tannem xok dil'lo.Yuvraj babak ravonaslelem ghoddlem. Avchit kankrache piddek to sampoddlo, tedna tache hozaramni mogi samkech gondoll'le, ekannench niraxi zale. Aplich gozal korun to mhonnttalo:"Mhojea sarkea khellgoddiank kankrachi pidda zali mhunn mandun gheunk mhakach avgodd laglem. Dor disak sov horam hanv kosrat (exercise) korpi.Tor khoinchi hi pidda yeunchi? World Cup khellant bhag ghetanam mhaka suvas gheunk avgodd lagtalem. Punn hem duens hanvem lipoun dovorlem, hanstem tondd somestank dakoilem. Ek khorem he pidde vorvim hanv odik xanno zalam; khas jinn mhoji kitli molachi tem somzolom. Teach khatir mhoje bhaxen kankrache piddek sampoddloleank zata te porim mozot diunk axetam" Yuvraj baban fuddem mhonnllem "Jerul tanchem dukh ani kallzachi khont atam bhesbori somzotam, kiteak hich koddsan hanveim chaklea. Az kankrache zonttu mhoje kuddintle bhair gele mhunn axea kortam, punn bhitorle ghai ani monache khontik pekovnni zai.
Yuvraj baban Lance Amstrong hea khellgoddiachi kotha vachli ani tantuntlean takai anink zannvay favli. Tor kotha ti kosli? Lance Amstron ganvan TEXAS Amerikecho dha vorsanche pirayer danvpant-penvpant ostad zal'lo. Maghir triathlons mhonnge ek hozar metr penvn vochop, 15 mail motorsaikolir danvddi korop ani tin mail dhanvon vochop oxem tin khellamni to bhag ghetalo. Uprant to saikol resint ostad zalo. Ani sat pavtti Tour de France to poile svater ailo. Taka har divpi dusro konnunch naslo. Punn avchit 1996 vorsa, 25 vorsanche pirayeruch astana tacheam anddkuleant (testicles) kankrachi pidda disli ti maghir tache kuddint choddli ani mendvak porian pavli. Lance baban motti kallji ghevun te piddecher to zhuzlo, ilaz tannem ghetlo ani dha vorsam modem nigut boro zaun anink panch resinim bhag ghevun jikun vhoir sorlo. Dubav na, sogllo sonvsar thottaklo, karann osle piddent poddlolo monis vanchunk chodd moskil.
Khorench Devacheo vatto mon'xak thaveo assonant, kiteak vankddeam vollincher nitt borounk Deva lagim ghoddtach. Ek zannar budh dita: Ek kitem futtlem tachi dhar ugti zata ani tech darentlean Devacho uzvadd bhitor sorta. Dukhant vignant tollmolltolo monis Devak laghim pavunk xokta. Vechik putachi kotha aikolear amkam mellta ki jedna to bhurgo apli bukh marunk dukranchem khann khavnk sodtalo, tednach to soirannant ailo ani aplea bapaichea ghora vochunk toyar zalo. Jerul fokot ek kalljiadar ani mozbut sobhavacho monis dukha-koxttant odik Devak chikttun ravta. Tench tem karonn: Dukhuch taka niz UZVADD dakhoita.
|
