 Panch vorsam fattim, konn Raxttrpotiche kodelir pavtolo? Vhoddlea lhan lokachim onek torechim motam aslim. Xevttak eke bailek he sodrer choddounk yevjili ani ti sort Pratibha Patilak lagli. Gozal khas obhimanachi kiteak poilech pavtt ek ostori amchea desant he unchle sodrer pavli. Atam panch vorsam uddlim. Ani kitem? Khoim gelo khoim na, kitem haddlem, kaim na oxench xem dislam. Disallim potram sangtat tea pormonnem itloch ticho rikord dista, ti borich porkeam desamni bhonvlea ani hea bhonvddeancho khorch 205 krutt odik aila. Zait tinnem aplo ani aple familicho bhesboro poramus kela.
Atam vichar uttla. Tiche kodel konnak favo zatoli? Xri N.R. Narayan Murthy, Infosys komponichea fuddareachem nanv aikunk yeta. Tech borobor Azim Premjik favo mhunn konn konn gazoitat.To ek khoddegant vepar-dhondekar ani udar kallzacho monis khub somajik kam korta, khas korun durboll bhurgeank xikxonn diunk xallo choloita.
Tea fuddem konn dista? Xri A. K. Antony aicho Zhuza Montrichem nanv vhoir sorta. To ganvan Keralacho Syrian katolk ghorabeant zolmolo ani kristanv xallent xiklo. Punn atam to Devak mandina mhonntta. Punn zobor nitoll sobhavacho monis, somest taka man ditat ani bhroxttachar kobar korunk to sodanch motti loddai korta. Keralacho Mukhel Montri to zalo ani somestancho motto abru-man taka favlo. Taka Raxttrpotichi kodel favo, tor poile pavtt ek kristanv monis Bharotak he zuttier pavtolo. Zaito lok taka Nitoll Babu (mr. Clean) ani Sant Anton osoi pachartat.
Anek babu asa to Mumboikaranche avddecho. Bollywoodantlo BIG B Amitab Bachanank ti kursi dilear Bharota bhair ravtole lok khuxal zatole mhunn konn konn uloitat. Fuddlea Otubrant taka 70 vorsam bhortat 43 vorsam adim to famad zaunk laglo. Sat Hindustani portugezam add loddai dakoilolem cholchitrant to survek dislo. Az tannem 190 cholchitranim kam' kelam. Borem xikop kelele familintlo bhurgo to. Survatak vhoir sorunk taka avgodd zalem. Amitabh bab team soglleam addkollincher loddai korit ravlo. Cholchitrantleam kolakaram modem chodd lovkik to. Kolkatak khoim tachea nanvan ek mondir choloitat. Ek matr taka gondoll asa, Gandhi ghorabeacho to ek ixtt aslo, punn atam tanche modem il'li futt poddlea ani tanchi ixttagot tuttun gelea. Teach Sonia ani Rahula vinnem vhoir soronkui avgodd asa. Poilim cholchitram tachi vegllim aslim. Anand filmant xant sobhavacho voiz koso distalo Deevar filmant to ragan uzo koso dislo. Az taka bhesborem nanv asa, ani zaite Mumboikar ti kodel takach favchi mhunn magtat. Tea fuddem konn yenvcho? Chodd korun zo pokx motamni vhoir asta, takach aple avddecho monis vinchunk mellta. Punn vattavronn pollelear ekui pokx mozbhut na, tor opokxi(apolitical) mon'xak ubho korcho mhunn sangtat.Ani kaim zannanchem oxem mot asa. Teach khatir Raxttrpotichi topi onek pavtt Abdul Kalam babak diunchi mhonn uloitat.Umannem tem, sangunk nhoi sompem. Konn sangot zait ravonaslolo Babu vhoir sortolo ani soglleank to ojapaitolo.
|
