Hea mhoineache 16ver, Kollongutt Panchayat soddun, Gõyantleam heram sogllea Panchayatimni venchnnuko zatoleot. Kollongutt Panchayatichim eleisanvam heach mhoineache 21 ver zatolim mhunn jahir kelam. Hea eleisanvamni choddan chodd Gõykar bhag ghetolet kai? Borea mon'xank nivddun haddunk Gõycho motdar vavurtolo kai? Ganvcho karbhar bore toren cholovpak Panchayatimni promannik mon'xank nivdun haddunk zonn eklea nagrikachem kortovea asa. Hem kortovea amche nagrik khoreponnim palltole kai?
Zayte umedvar: Panchayatinchea vaddea-vaddeamni zoxe porim umedvar ube ravleat te polloilear vichitr dista. Eka-eka vaddeant 10 porian umedvar asat khoim. Khoreponnim ek Panch zavop hi ek vhodd zababdari. Peleachi seva korpachi hi zababdari. Ede vhodd zababdarecho bhar aplea bhuzancher ghevpak kaim monis sompeponnim kiteak fuddem sortat kai? Khorench tankam lokachi seva korpachi ich'cha asa kai? Panchayaticho ek Panch zatoch taka pagar kaim asona. Itleim asun lokache sevent kitloch vell diuncho poddta ani trasui kaddche poddtat. Eka-eka vaddean itle umedvar ravtat tem polloun Panch zatoch seva nhoi, vell divop nhoi, tras kaddop nhoi punn Panch zatoch borem 'mhonv' mellta kai kitem? Osle vichar nisvarthi nagrikanchea monant zata.
Chor, fotting: Mayache 16ver, zavpi Panchayat venchnnukam vixim tore toren ulovpi zayte lok asat. Konn mhunntta Panchayat venchnnukek amchem mot diun kosloch orth na kiteak zonn eklo zo Panchayat eleisanvank ubo ravta to aplea faideak lagun ravta, dusreanchea boreaponnachem tankam kainch poddunk na. Konn mhunntta ekdam Panchayatin pavlo mhunnttoch fokt panch vorsam bhitor tachean zayte duddu ekttaunk zata. Lokachi progoti sodduch punn svothachi progoti bhes bori korum yeta. Hakach lagun ekdam Panchayatin gel'lo monis portun vochunk zayti khottpott kortach. Itlench nhoi nove nove monisui, adleamni svothachi progoti kelea ti polloun, apunnuim venchnnukamni bhitor sorta. Hakach lagun zayte nagrik motam diunkuch vochunk sodina kiteak tanche nodren eleisanvank ube ravpi sogllech chor, fotting ani nagovnne.
Motachi thakot: 'Hanv mot diunchona' vo 'Hanv mot diunchina' oxem mhunnlear to proxn sutt'tta? Na! Hanvem mot na divop mhunnlear chor, nagovnneank ani fottingank jikun yevpak adar divop. Mhojea ekach motan eka nagovnneak haroum yeta, mhojea ekach motan eka bhroxtt umedvarak Panchayatintlo bhair uddoum yeta, mhojea ekach motak lagun mhojea ganvant borea promannik mon'xachi Panchayat ghoddoum yeta. Amchem mot kitlem podvedar asa tich amkam khobor na. Mot divop ho amcho hok'k ani kortovea zaun asa. Amchem mot itlem bollixtt asa ki tacheam Panchayatin porivorton (change) haddum yeta. Tea khatir 'hanv mhojem mot ditolonch/ditolinch' oso nirnnoy gheum-ya.
Sodun kadd: Sogllech chor, fotting ani nagovnne mhunnpant bilkul sot na. Thodde punn tantun bore monis astole. He bore monis konn te sodun kaddpachi goroz asa. Toslea mon'xank sodun kaddunk matr poriant kotthin nhoi. Eka vaddeant eleisanvank ube ravpi soglle monis tujeach vaddeantle. Tum tankanch nhoi punn tanchea avoy-bapayank, tachea xamaim-xapayank ani tanchea vaddeantlea sogllea soiream-daireank bhes boro vollkottay. Oxem asa zalear ami zonn eklean khoincho umedvar sogllea umedvaram poros boro ani promannik asa, lok-sevechea mogacho asa hem sompeponnim sodun kaddum yeta. Hech porim sodun kadd ani tea borea umedvarak tujem mot di.
Tulna kor: Torui punn anik ek proxn ubo zata. Somzum-ya eka vaddeant ube ravlole soglle umedvar khorench chor, fotting ani nagovnne asat. Oso prosong ailo zalear eka motdaran kitem korpachem? Mot na divop hench sarkem nhoi? Henvuim chukichem. Mot dinastana ravop ek vhodd chuk ani amchem bezababdareponn.
Sompoytana: Amchim motam bollixtt ani podvedar. Amchea motamni nagovnneank haroum yeta ani promannikank jikoum yeta. Amchea motamnich ganvant bodol haddum yeta, ganvchi udorgot korum yeta.
|
