 Mayache 2rer, Pattear Sanskruti Bhavan hea novench ubharlolea Sobhaghorant Gõychea sorkaran tegam mhan Gõykarancho bhovman kelo. Bab Mario de Miranda, veyangchitrkar (cartoonist), bab Anthony Gonsalves, songitkar Maestro ani Nana Shirganvkar,bhokti gitam gavpi hankam mornna uprant tanchem nanv omor kelem. Gõychea Vidyapittant tanchea ugddasak Xonsodhan Adhyasthapan kelem(instituded research chairs) Mhonnge Gõychea vidyapittant te-tea kalla vhoir khol obheas korunk mhotvacho sorkari adar xikpeank favo zatolo. Xri Manohar Parrikar, Mukhi Montrean zoxem poilench sangun dilolem 45 lakhanchem dan vidhyapittak dilem. "Amchea tegam Gõykar putancho omor ugddas dovrunk hi Gõychea sorkarachi khuxi mhunn tannem sanglem.Bab Mario-n zori chitram kaddpachem khas xikop korunkna, tori hi kola tanche bhitor soimbinch disun aili. 1953 vorsa Times of India hantun 'cartoonist' koso tannem aplem kam' suru kelem.Tache ikmotin kelelim chitram sonvsarak pavlim ani sat somdir utrun akhea yugak tachem nanv gazlem. Amerikek, Germanik, Japanak, Fransak adi desamni chitram kaddunk taka amontronn favlem.Tachi khas kola motteam-motteam kolokarank avoddli ani ontor'raxttrik mollar legun taka puroskar favle. Bharatantui zaitim inamam taka mell'lim, kherit bhaxen Padma Bushan ho sorkaracho unchlo puroskar taka mell'lo.
Anthony Gonsalves, ganvan Mazordecho, bapui tacho Igorjecho mestir aslo ani aplea bapai lagim to violin rebek vazounk xiklo. Gõyant taka titlo fuddar aschonam mhunn chintun, bab Anthony Mumboint gelo ani khorench ek nanvlovkik maestro zaunk pavlo. R D Burman,Pyarelal heam Bollywood yugantlea direktorank bab Anthony-n violin vazounk xikoilem.Teach khatir bab Gonsalves-achem nanv odik famad korpak Pyarelal songitkaran "My name is Anthony Gonsalves' hem somestanche avddichem git ghoddlem. Amitabh Bachan," Amar, Akhbar, Anthony' cholchitrant Anthonychem nazuk svong korta. Bab Gonsalves poilo Bombay Talkies hantun songitkar koso sevek laglo. Anil Bishwas,Shyam Sundar, Naushadheam motteam songitkaram borobor tannem kam' kelem. Maghir 1958 vorsa tannem 110 kolakarancho 'Indian Symphony Orchestra'pongodd ghoddlo Lata Mangeshkar ani Manna Dey he tachim gavpi aslim. 2010 vorsa IFFI utsovant , 'Anthony Gonsalves, the Music Legend' hea cholchitrant tachi songit kola dakhoun dili ani ek kherit inam' tankam favo zalem. Tisrea mon'xak bhovman dilo to zaun asa Nana Shirganvkar,bhajan ani bhokti gitam gavpi
Hea suvalleak bai Laxmi Gonsalvesan, ulovop korun aplo ek xinn porgottlo "Mhozo bapui 1986 vorsa Gõyant portolo ani Gõychea tornatteank apli songit kola xikounk tacho ek vhod anvddo aslo, punn tea kallavoilea sorkaran ulo tacho kanar dhorlo na. Parrikar Sorkarak xabaski diun teg Gõykar putank man diun khas Gõykaranchi kola unch ubharli mhunn tinnem sanglem.
Hea suvalleak Nishad Miranda, bab Mariocho put, Xmti. Melita ani Laxmi, bab Gonsalves-achi ghorkarn ani dhu ani Xmti. Laxmi, bab Nana Shirganvkarachi ghorkarn hajir aslim.
|
