Ek Sfurthi: Eke avoy-bapaik ekttoch put aslo. Avoy taka bori dekh diun vaddounk vavurta. Aplench jivit dekhichem korta. Lhan astanach taka Deva Utracho mog ani ghoddsann dita. Povitr Pustok vachun taka somzonni dita. Oxem korun ti aplea putachea kallzant deivik mogachem bim roita. Ho bhurgo vaddta toxem tacheant vomplolem bim vaddot veta. Jivitant addkholleo yetat tednam Devachea Utrachea adaran konn porim zoit mellounk zata tem pasun to xiklolo. Bhavarthache nodren to soglle torechi poristhiti hatallunk xiklolo. Magir to logn zaun ek Devachea mogacho ani bhiranticho ghorabo ghoddta. Tacho ghorabo ek nomunnik ghorabo zata.
Devachem Utor: Ezekiel Provadiachea Pustokantlem poilem vachop ami aikolam. Tantum, Provadi Babiloniechea pordesa vellar, porje lagim bhorvanxachim utram uloun tankam buzvonn dita. Dev Aple porjek raktolo ani samballtolo kiteak dilolea bhasavnnek To sodanch visvaxi. Sonvsari razvottkeam porim moddon veta tosli Devachi razvottki nhoi. Devachi razvottki sasnnachea sannak togta. Lamb rukh Dev mottve korta ani mottve te vaddoita, pachvim zhaddam sukoita ani sukloleank pachvim korta. Markuchea Xubhvortomanant, bori dekh nirfoll zaina mhonn khatrechi xikovn asa. Sansvachem lhan bim zomnnint purtoch tem vaddon porsantlea sogllea zhaddam poros vhadd zata. Tacher ontrollantlim sovnnim zhaddachea khandyamni vosti kortat. Devachem raj sthapunk mhollear lhan lhan vostumni survat korchi asta. Povitr Sobha rokddich vhodd okhondd zaunk na. Jezun bara zannak survek vichun kaddle. Hem lhan bim. Aiz Povitr Sobha vhodd rukh zala. Sant Paulun Korintachea Kristanvank boroylole Chittint, Pauluk apnnak bhogunk poddchea aslolea mornna vixim zagrutay asta. Apunn jivitant toxem mornnant Somia Jezuk ekvottlolo asam mhonn to sangta.
Amchea Jivitak: Ami sosnnikayen jiyeunk xikumya. Somia Jezucher patyeun ami bhorvanxan jiyeunk vavrunk gorjechem. Sorginchea rajea vixim he voparint zaito ul'lek asa. Hea Somiak mellunk amcho usko zaunk zai. Ami toxem kortoleanv zalear sansvachea konnea porim khaltikayechim zaun Deva Utor amche jinnent bhitor rig gheunk diunk zai. Hea Deva utrachi ghoddsann dusreank pasun diunk ami vavrunk zai. Hem amchem karya ani povitr zobabdari. Zoxe porim te avoyn aplea puta sorim kelem toxem ami dusreank adarachim zaunk vavrunk zai. Zoxem ami vomptanv toxem amkam foll melltolem. Borim follam rovum-ya. Amchea bhurgeanchea kallzant Kristi totvam zoxe porim sot ulovop, bhavam-bhoinnicho mog korop, bhogsonnem divop-ghevop chodd gorjechem.
|
