Ghottok Rajeachim 25 Vorsam' hea vixoyacher fattlea don lekhamni kaim mhotvachea mud'deancher ami toddkeant chorcha kelea. Anikui oxe zayte vixoy asat zancher ami zayti chorcha korunk xokta punn toxem kelear ho lekh sompchoch na. Tea khatir hea lekhachea akerchea bhagant ami vixesponnim Gõykaracher ani fattlea 25 vorsamni bodol zalolea tachea sobhacher il'lo niyall korum-ia.
Monisponn: Adim Gõykar sodanch mogall ani doyall asle tacho mhaka ugddas zata. Bhukeloleak khaunk, taneloleak piyonk ani vinglleak nhesonk divpi he gunn Gõykaram bhitor azun poryant jive asat kai? Gõykar monis peleak borem korpi aslo. Heach gunnank lagun Gõykaram bhitor, lhan ani vhodd, gorib ani girest, adi bhedbav zoxe Bharotachea dusrea prantamni asat toxe Gõyant tori nasle. Punn aiz nodor marli zalear pollounk dukh bhogta. Aiz Gõykarak peleachem poddonkuch na mhunnlear fott zanvchina. To itlo svarthi zala ki apleak jem kitem boreak poddta tem korun ghevpak to kosoch fattim sorona, dusro trasan poddlear zata. Hea 25 vorsam bhitor ami Gõykar amchem monisponn visorleat kai kitem?
Tornatte: Adlea kallar amchea somazantle bhurge ani tornatte kitle mogan ani respedan vagtale. Aplea vhoddilank favo to man divop te aplem kortov'vea somzotale. Aplea vhoddilanchem sangnnem sokol uddoynasle kiteak jem kitem vhoddil sangtat tem aplea boreakuch sangta mhunn mandun ghetale. Durdoivan aiz ti poroisthiti urunkna. Aicho tornatto aplea vhoddilank favo te porim man dina. Vhoddilanche adesh 'Old fashioned' mhunn sangun kuxik marta ani aiche tornatte apleak zai tench kortat. Aicho tornatto apunn svotontr asa ani apunn korta tench borem mhunn xati fuloun sangunk fattim sorona.
He vagnnukecho porinnam mhunnlear aiz kitle tornatte tovnaxi zaun bhonvona zayt? Kitle tornatte vesnnamche gulam' zaun aplem jivit nas korina zayt? Kitle tornatte jive asun poryant aplea avoy-bapayank lojeche bhorik ghalina zayt? Hacher ami matr punn upay ghetla kai?
Dhormik jinn: Aichea Gõykarachi dhormik jinn khoim pavlea kai? Eka Kristi ghorabeachem udharonn ghetlem zalear prot'tek ghorabeant sanje vellar ghorant aimori zatali, uprant ters kortale, tea uprant nhidunk veche adim ani sokallim utthlea uprant Devak argham ditale, sokallche sodanch igorjent Misak hajir zatale, adi.. Aiz Gõychea Ghottok'rajeachea 25 vorsam uprant tench dhormik vattavoronn amche nodrek dista kai?
Sangunk dukh bhogta, aiz amchea ghorabeamni dhormik vostu komi zayt geleat. Aimori ani ters kortole bhov thodde ghorabe disti poddtat. Jevnchea vellar vo nhidchea adim ani sokallim utthlea uprant Devak argham diupak amkam tor velluch na. Punn voranchim voram 'television'-a somor bosun orth naslole 'serials' ani dusre program pollounk matr amkam bhorpur vell mellta.
Vagnnuk: Oxem dista ki fattlea 25 vorsanchea kallant Gõykarancho sobhavuch mudar zala so. Adlea kallar ken'naim ek khun zalo zalear Gõykaranchea angar kantto ubo zatalo. Aiz khun zavop Gõykarank sodanchench zalam ani monis mon'xak marta tem pollounk amkam kainch vaitt disona. Fattlea vorsamni choryo ani zhogddim zalim zalear kallzak doko bostalo aiz choryancho ani zhogddeancho amcher kosloch porinnam zayna. Fattlea kallar khoinsorui chukun ek bolatkar zalo zalear ami amkanch zonvaram poros paxtt zaleat mhunnunk fattim ravonasle. Aiz 'rape' zavop amkam ek 'fashion' koxem dista kai? Oso proxn poddta. Amcho sobhav, amchi vagnnuk itli bodol'lea ki fuddarak ami koxe vagtole kai? Hoch odmas korunk kotthin lagta.
Sompoytana: Gõychea Ghottok'rajeachea 25 vorsanchea kallant kitem borem ghoddlam taka lagun vakhann'nni korum-ia ani teach borobor jem vaitt ani duxtt ailam tem il'lem il'lem nas korunk taktiche upay gheum-ia. Oxem kelearuch Gõykarank Ghottok'rajeacho khoro faido melltolo!
|
