Halinch Avitus Cruz baban "Goans in Sports" hea nanvachem nazuk pustok uzvaddailam. Tea pustokachi thoddi khobor ami fattim kelea. Az anikui il'li khobor korum-ia.
Portugezanchea kallar thavn Gõyant chodd avddicho khell mhonnlear futtbol. Konn sangtalo "tuka futtbol ruchonam zalear tujem Gõykarponn bellxelam".
Ganv-ganvamni ani xetam-bhattamni il'le-il'le pott'tte lhanso bol ghevun humedin aplo vell sartale. Hoki, krikett vo basketbol osle khell vhodde humedin khelkltale punn adlea kallar tosle khell Gõyant bhov thodde distale. Futtbol khell mhonnlear khorem sukh amcheam bhurgeanchem.
Gõykaramni futtbolan vhodd nanv haddlam mhunn vhoddlea obhimanan Avitus bab sangta "Gõyche 53 khellgoddi ontor'raxttrik mollar pavle zalear, Nevile D'Souza ani Fortunato Franco he ontor'raxttrik Olimpik khellamni vhoir sorle".
Az ami kaim adleam futtbol khellgoddiancho ugddas korum-ia:
Neville D'Souza: Poilea vorgacho to khellgoddi zalo. Golache zallyent bol topunk konnuch dusro taka lagonaslo. 24 vorsanche pirayecho to aslo, Roma xarant Olimpik khellant to pavlo. Australiacher Bharotan 4-2 golank zoit vhelem, Nevillan tin gol marun motto rikord dovorlo. Tea mukhar Yugoslavia lagim khelltana ekleanunch kaim khellgoddiank fottovn ek bann koso bol golant toplo. Tedna olimpik khellant odik gol marpi mhunn to ostad zalo. Ek matr: oslea poilea vorgachea khellgoddiak ek inam diunk matr amcho sorkar visorlo.
Fortunato Franco: Tata klubak to khelltalo,mottim ojapam to kortalo, gol marpant ek magician" oso taka pacharunk zatalo.1959-1965 vorsamni fattafat 7 vorsam to zogzoglo. Romak Olimpik khellant tannem bhag ghetlo. 1962 vorsa Indonesiak, Dokxinn Korea lagim khelltana tankam haroun bhangra bil'lo taka mell'lo ani 1964 vorsa Malyasiak, Merdeka Futbol tornamentant rupea medal takach lagun ti favo zali. Dubhav viret, Bharotacho boreantlo boro half back, to Frankoch aslo
Anthony Braganza: 'Braggie" oslea nanvan sogllo lok taka vollkhotalo. Mumboiche Vydyapittachoi huxar khellgoddi to aslo.Moidannar virodhi khellgoddea rokddoch naddun fottoitalo.Ratlam-acho Maharaja tancho khell polleun chodd ojaplo, porxim taka porbim diunk ailo ani bhailea desant taka training diunk to raji zalo. 1954 Helsinki Olimpik khellunk vecho aslo, avchit kosli dukh zaun taka fattim dovorcho poddlo, Tea kallailo toch poilo vorgantlo khellgoddi to. Punn boreant boro soeg tacho ibadd zalo.
Derrick D'Souza, bhav Nevillacho, tosoch khellgoddi poilea vorgantlo. Angllotin lamb ani okhondd, itle ikmotin to bol khelloitalo ani khoinchoi zago moidanar taka dilear to chodd borem kam' kortalo.Poilea vorgantleam khellamni to jerul astalo.
1964 vorsa Malyasiak Merdeka tornamentant ek hat-trik keli ti khub gazli. Unchlo aslo record tacho. Mezunk gelear vhoddlea khellant 16 hat-triko keleat ani tin dupett hat-trki tacheo asat. Gõychea sorkaran inam diun 'Outstanding Goan outside Goa" oso taka vakhannlo. S C Shivaji ani dusre mottim inamam taka favleant.
Sov Gõykarank Bharotachea pongddanche kepten zaunk bhag mell'lem ani nanv tachem itihasant boroun urlem. He asat te: Brahmanand Sankhwalkar, Maricio Afonso, Bruno Coutinho, Roberto Fernandes, Cimax Lawrence ani Mahesh Gavli.
|
