 PONNJE: Gõyant sigretti (cigarettes) voddpacher bondi ason poryan bhovxik zageancher lok chodd sigretti voddlole pulisank sampoddtat mhonn V. Ixtt-ak mell'lole mahiti pormonnem kollon ailam . Hottelam, bazar ani hospittolam sarkea zageancher sigretti voddpa add 'no smoking' mhonn jayrateo divn suchovnneo kel'leo asat. Ponn tachi beporva korun sigretti voddpeancher pulisamni karvay kel'li asa oxem chovkoxi kelea uprant uzvaddak ailam.
Kaydean iskolam ani kolejim lagim aslolea gaddeancher vo dukanamcher sigretti ani guttka vikunk dovorpak koddok bondi asa. Ponn oslea suvatancher heo vostu lip-choriyam viktat. Hea vixim vochot thoim kaydo moddpache arop asat mhonn ugddapem zalam. Fattlea 5 mhoineanchea kallant bezababdaren ani kaido moddun sigretti voddpi, toxench guttka khavn mellot thoim thukpeancher pulisamni donndd ghatlolean sorkarache tizorent 1.75 lakh Rupiya yennavoll zoma zalea, oxem Ponnjeche mukhel pulis kocherintlean kollon ailam..
Sigretti voddop toxench guttka khavop mon'xache bholaykek chodd vaitt, ani tache udexim mon'xak kankr(cancer) ani her zayteoch pidda zanv yetat mhonn sorkar toxench NGO sonvstha vello-vell zagrutay haddtat. Punn hacho khol porinnam lokacher azunuy zavnk na, oxem pulisen diloli ankddevari pollelear spoxtt zata. Chalu vorsachea Janer tem May mhoyneache xevottak meren pulisamni Ut'tor Gõyant 723 zalear Dokxinn Gõyant 754 zannank donndd dileat.
Tanche modem 20 vorsam sokoilea tornatteancho ankddo chodd asa, oxem eka pulis odhikarean hea potrkarak sanglam.Tannem fuddem sangleam , donndd 100 Rupiya ason zannim to bhorunk na tankam niti ghorant ubhe korche poddlem.
Indian Medical Association (IMA) hacho adlo sor-chitnnis Dr. Gokuldas Sawant hache kodde hea vixoyacher bhasa-bhas keli tedna, tannem sanglem. "Kaim lok fokot mouza mhonn sigretti vo guttkacho vapor kortat. Tor kaim zann koslemi dukh aslear tacher visor ghalunk hem kortub adhartat. Kosli vaitt sonvoim ek pavtt monxak lagli zalear, tantuntlean bhair soronk khupuch avgodd. Sigrettint 'Nicotine' sarki vost (substance) asta. Zache udexim sodanch sigretti voddpi eka mon'xak kankra sarki bhirankull pidda zavpak xokta. Sigretti pakittancher tea vixim xittkavnni diloli asonuy lok tacher durlokx kortat. Ani hachem karonn mhonnllear lokam modem sigrettichea vaitt porinnama vixim azunnuy favo ti zagrutay nirmann zavnk na oxem spoxtt zata. Jea gho rant ek vhoddil mon'is sigrett voddpi aslo zalear, taka dolleam add korunk favona. Ponn tea mon'xak zata titlo tea vesonam pasun pois dovorpak proytn korpak zay . Tori ponn sigrett voddop vo na hem tharavpachem zonn ektteachea hatant asa, hem poryan titlench sot. Sigrett voddpachi vaitt sonvoim poysavpachi chodd goroz asa oxem hea zannkar dotoran xevttak sanglem.
|
