 PONNJE: Bambole hanga aslole 'Goa Medical College'-intlea choddxe dotor sorkari nokri korunuy, aplo khasgi vevsay (private practice) choloytat mhonnpacheo tokrareo vaddot asat. Taka lagun hea tokrarinchi nond gheun ani barik topasnni korun, ek volleri toyar korun GMC-chea mukheleank diloli. Toruy ponn ho kaydo moddpi dotorancher azun meren koslich karvay zavnkna. Bekaydexir kamam korunuy tanchea pogarant ani her sovlotimni vadd korpak sorkaran tharaylam hea khatir GMC-nt vaurpi her kamdaram bhitor sontapchem vatavoronn nirmann zallolem asa oxi mahiti V.Ixtt potrkarak mell'lea.
GMC hospitolachea khupxe zannkar (experts) dotor sorkari norkre poros khasgi vevsay korunk odik lokx ghaltat oxeo tokrareo fattim sabar vorsam zalim lok kortat.Haka lagun Bholayke khatean sot sodun kaddpak chovkoxi suru keloli. Sorkari sevent aslole he dotor sorkara koddlean sogllea sovlotincho labh gheunuy tanchem somadhan zayna ani te sorkari nem' ani kayde pallinant mhonn oslea dotoranchi ek volleri vo list Bholayke khatean toyar korun GMC-k diloli. Bholayke montri Laxmikant Parsekar hannem hea dotorancher koddok karvay korchi oso adexuy kaddlolo, oxem GMC-ntlea sutramni V.Ixtt-ak sanglem.
" Khasgi dotorki korpeank sorkari seventlean kiteak kaddche nhoy? Oso soroll proxnn Bholayke montrean aplea adexentlean kelolo. Toxench hea dotoramni tin mhoineam bhitor aplo khasgi vevsay bond korina zalear ek tor tankam 'suspend' vo kaydexir karvayank fuddo korcho poddtolo oxi-i xittkavnni hea adexantlean diloli. Ponn nimannea vellar GMC-ntlea mukhel odhikareamni ho adex fattim ghevn hea viximcho sogllo potr-vevhar bhair uddoylo oxem lagim aslolea (close sources) eka odhikarean hea potrkarak sanglem.
GMC-nt sod'deak onnbhovi ani zannkar dotorancho unnav asa, taka lagon hea dotorank kaddle zalear tacho vaitt porinnam GMC hospitolant yevpi piddestancher zatolo mhonn GMC-ntlea unchlea odhikareamni ek vako toyar korun Bholayke khateak ami Bholayke Montreak dhaddlo oxem kollon ailam. Haka lagon khasgi dotorponncho vevsay korpi dotoramni ap-khoxen ho dondho soddun, sorkar dita tea pogaracher khoxal zavpa khatir tankam her boreo sovloteo divpachem nattok sorkar korta oxem GMC-chea vattharant uloytat tem aikonk yeta.
"Oslea dotoranchea pogarant vadd korum vo tankam ditolea sovlotimni vadd korum , ponn te aplo khasgi vesay korpacho dondho koxench soddchenant. Az puray Bharot desant sorkari sevent aslole dotor hench korit aileat ani korit asat.hem bond korunk sorkara lagim kosloch kaydo na hi ek dukhachi gozal. Dotorponna sarkea povitr vevsaya kodde kaim dotor duddvanche axek lagon don kodden nokri korun piddestanchea jivita kodde khelltat." oxem sorkari seventlean nivrut (retired) zalolo namnecho cardiologist Dr. Dinesh Gaotonde hannem V. Ixtt potrkarak sanglem.
|
