 Az-kal hanxe marpache khup klub utpon'n zaleat. Humedichi gozal mhonnlear ji pidda voyzam lagim bori korunk zayna ti hanxe marun nanch zavnk xokta.Ek mavxi apli tokli foddttali mhonn mhaka sangtali, kitlinch vokhdam ani pil'lam ghetlim toriponn thambona zali. Ti hanspachea klubant vangddi zali ani tichi tokli foddpachi apxinch bond zali.
Punn halinch hanvem ek vegllich gozal aikoli. "Sheetal Jogging Association" hea nanvan Pune-eant choltolea eka klubant 30 zannam bhag ghetat. Sokallim tim ekttaim zaun bhojan gaytat, tallyo martat ani humedin hanxar hanxe soddtat. Sot sangchem mhonnllear choddxea zantteleank ratchi nid poddona. tankam sokallim fantodder nid lagta. Ponn hea klubacho hanxar hanso soddlolo boball zalolean hangachea zantteank nid poddunk tras zavnk lagle. Xezarchoy khup lok samko bezar zalo.
Hea hanso soddpeancher koxi ghuri ghalchi tacher konnem eklean plan kelo. Xevttak Vinaik Shirsat fuddem sorun kottant tancher 'case' manddli.
Tanche case-icher nitidaran oso nirnnoy dilo: "Sokallim fantodder hanxe marun lokak trasant ghalop sarkem nhoy. Tumcho hanso mhonnllear dusreache trasanchem roddnnem" ani xevottak hanxar hanxe soddttoleank bondkhonnint ghalunk tannem formonn marlem.Hanso soddttoleancho hanso urunk na. Tankam hanso soddunk novo zago sodcho poddlem. Mhojea bhurgeaponnar hanvem Khaprea Zuanvchi gozal aikol'li.To motto dhollyo aslo. To khoinsorui kam' kortalo, ani dha minut pott bhor hanstalo. Tachi ghorkarn tacher gorom' zavn taka tastali, ponn to zobab dinaslo. Fokot hansot ravtalo. Kaim lokak hem Zuanvchem kortub atvench lagtalem. Khuxal ravunk hoch tacho boro upay. Fokot monis hansta ani makodd? To hansta so dista ponn to nattkam korta. Devan hanspachem dennem fokot mon'xak dilam. Hanstolea mon'xachea xiramni rogot borem dhanvta. Bholayki bori ani mon xant urta.
China-nt ek 'Laughing Buddha' aslo. Tachea pongddant zayte vangddi asle. Te chodd dhadosponnan jiyele.Tannim ulovpam korunknant, sermanv sangunknant. To fokot khoim loka modem vetalo, pott bhor hanstalo. Khup lok zoma zatalo. Sogott lok apxinch hansunk lagtalo. Khonti-dukhi, zhogddim kestavam, rag-dusmankay visrun lok ghora portalo. Thoddea lokachea mukhamollar sodanch kallok, tancho boncho vankddoch vankddo. Thoddea lokachea mukhamollar rosroxit hanso ani uzvadd asta. Amcho ek mistir aslo to amkam mottean hanslear rokddoch pirluk marun il'li dhomki ditalo: Are! kitem hanstay. Jezu khoim hanstalo? Somi Jezu jerul khuxal dhados monis aslo.
Tacho axirvad ghevnk avoyeo dhanvun yetaleo apleam borank addtaleo,pakti ani dhonddvosuldr tancho sangat sodtale,dukhi khontik sampoddlele tachi phatt soddinasle,patkachea fasak sampodd-lele,tachi mafi te sodtale.Jeul Jezu khuxal hansto aslo, teach khatir sogttancho To avddecho zalo.
|
