NOVI DIL'LI: Beijing hanga zalolea Olympic-antlea kusti khellant kanxeachem podok (bronze medal) melloylolo pelvan Sushil Kumar, London hanga zatolea Olympic-ant Bharot desacho bavtto ghevn mukhar voytolo mhunn desache kusti songhttonnen kollit kelam. Julay mhoyneachea xevottak London hanga zavpa aslolea Olympic khellamni bhag ghevn Bharot desachea pongddam barabor desacho tin rongi bavtto ghevn fuddakar divnk Sushil Kumar haka nivddun kaddla oxem Bharotiya Olympic songhottnnen jahir kelam. Hea vhodd ani obhimanachea karyak Sushil Kumar hannem apli maneotay dilea mhunn kollon ailam. 66 kilochi freestlyle kusti khellgoddi Sushil Kumar Julaychea 27 ver suru zavpi Olympic khellanche ugtavnne suvalleachea adlea disa London pavtolo ani magir rokddoch aplea proxikxonna khatir Belarus hanga vochpak bhair sortolo oxem tharaylam. Tea uprant aplea pongdda barabor Sushil Kumar Julayche 5 tarker Olympic khellamni bhag ghevpa khatir porot London yetolo. Bharotacho bavtto ghevn fuddem vochpa khatir poylim Abhinav Bindra hea rifleman-achi nivodd keloli. Punn aplea proxikxonnak tras zatolo mhunn tannem tin nakarli. Hea obhimanachea karya khatir uprant Sushil Kumar hachi nivodd keli. Fattlim kaim sumanam IOC hi Bharotachi Olympic songhottnna Bharotacho bavtto vhorpi mon'xache sodik asle. Tankam survatek tennis khellgoddi Leander Paes hachem nanv suchlolem. Punn atam tannim Sushil Kumar hachi nimanni nivodd kelea jea vixim te jahir kollovnni beginuch kollit kortole.