Adlea kallar dadlo vavr kortalo ani ostori ghorabo samballtali. Ani haka lagun daddleak ghorabeacho vhoddil mhunn man aslo. Ghorabeache mukhi tharav to ghetalo. Ghorabeant vaitt-borem kitem-I ghoddlear, ti tachi zobadari asli. Ani oxe amche ghorabe xikop cholot ailole. Tea kallavelea ostoreank titlem xikop naslem. Ani tim aplea ghorkarak sodanch man-respet ditalim. Ek ghov aple ghorkarnnichea adaran ghorabo choloitalo tedna tea ghorabeant rit – rovis, xist, vellachem mohotv aslem. Sotak ani promanikponnak man aslo. Dor eklo aplea khatiruch nhoy , punn puray ghorabea pasot jiyetalo. Vhoddlim kitem sangtat ani suchoytat tem aplea borea khatir mhunn ghorabeache vangddi somzotale ani ghorabeacho mog ani ekvott mozbut korunk adar ditale. Ostori ghorachi urunk na: Aiz ostori-i xikxit zalea. Ti vavr korunk laglea. Apunn unnea dorjeachi mhunn ti mandun ghena. Dadlea poros ti voir urona zalear tache borabor tori ti urta. Ostori ghorcho vavr korcho korun kocherint vavurta ani Povitr Sobhechea vavrantui ti misoll zata. Somajik karyantui vantto gheta. Thoddea zageancher ti dadlea poros chodd vavr korta mhunnlear otitay zanvchina. Aiz aplea ghorkara lagim porot-porot duddvanchi mozot magpachi tika goroz na. Tichea hatamni duddu khelltat. Thoddeo ostoreo rajkaronnant pasun zobabdarechim podam samballtat. Ostoream vorvim zaitem boreponn mell'lam. Punn ostori ghor samballtat tedna borem aslem kai? Tea kallar ghorkarak man-respet melltalo, to azi mellona? Ostori vavrak veta tedna aplea bhurgeank favo to vell ani mog diunk pavona? Aichi ostorek randunk favo to vell mellona? Aiz ostori ghorant asona haka lagun ghorant rozar, vellar borem jevonn, kuttumbhant mog ani mogan vell sarop oslem atanchea ghorabeamni dista kai? Dadlo sonvsarachoch zala: Ghorachi zobabdari ostoren apnnacher ghetlea mhunn dadlo zay toslem jivit jiyeta. Ghorchea rozarant , jevnna chea mezar disoch na. Vicharlear tapta. Bhurgim tachea mogak axetat. He toren aplea ghorabea sovem to tachi zobabdari visorta. Zaite dadle mottko ani jugar khellun, sorteo kaddun duddu vogddaytat. Thodde vaitt vysanamni apleach jivitachi vatt laitat. Thodde apli bail astana dusre ostoreanche gulam zavn aplo man vogddaytat. Tankam jivit novsorpache upay asat te vaprunk sodinant. Dadlean ani bailen aplea jivitacho bhes vollkhun gheuncho. Logn zatoch tim avoy ani bapuy zatat. Apli zobabdari bore bhaxen pallchi. Aplea vevsayantlean dusreank bori dekh dinvchi. Devan jem kitem tuka korunk bhasailam, tem mogan korchem. Ani aplem chukta zalear, tem vollkhun gheun, novsornnechim pavlam marchim!