PILAR: Pilarche Sonvsthecho nigtoch vinchun kaddlolo novo Xrextt Vhoddil Pri. Francis Carvalho hannem aplem poilench ulovop kelem. "Ami misionari zal'lean misionari varant virodh ani koslem-i addmhellem upraslam mhonn, ami zaito misionari vavr kela to puro mhunnun oge ravunk favona. Ponn amchea hatant dil'lem karya vo misanv sogllea nettan ami fuddem vhorunk dekhichea jivitachi goroz asa mhonn Xrextt Vhoddilan sanglem. Agostache 12ver Aitaradis sanje Pilarche Seminarichea Kapelant Xrextt Vhoddil Pri. Francis Carvalho Mukhel Yadnik zaun Misachem bolidan bhettoilem; tea vellar to uloitalo. "Misionari vavrak fuddakar ghetolea misionaranchi goroz asa" ho aslo tea disachea Misacho vixoy. Amcho misionari vavr fuddem vhorunk Devachem Utor amkam boll ani sfurti diun amchem jivit hurbhebhorit korta mhonn Pri. Carvalhon sanglem. Ami jitli vatt tanktanv titlim ami thikannar pavleanv koxem dista; ponn tem ek sopon zal'le porim. Ami amchem karya vo misanv fuddem vhorot ravunk zai. Ekcharan vattô tankun ximô utrum-ya. Pilarche Sonvsthechea dor eka misionari vangddeachea sohokaran Kristak porgottunk mhaka nivddun kaddla, oxem Xrextt Vhoddil Pri. Francis Carvalho-n sanglem.