NAVIGATION
:: Home
:: Ogrlekh
:: Vachpi Boroytat
:: Ganv- Ganvcheo Khobro
:: Khellache Umedhir
:: Katolk Khobro
:: Archive
KHERIT LEKH
:: Tazo Uzo
:: Mumbai Dek’ko
:: Pollelam tem Boroilam
:: Vopari
:: Liplelim -Motiam
:: Kovita
:: Vavrachi Tokhnnai
:: Aitarachem Vachop
:: Denneacho Sagor
:: Kherit lekh
:: Movie
 

 
  ::Vavrachi Tokhnnai ::
Sanathan borem kam’ korpi?

Zaiteo songhottnnam ani sonvstha borem kam' kortat ani somazak boreponn haddtat. Punn boreponnachem kam' kortole dusreancho ghat gheupacheo kornneo poisaitat.
Punn sonvsthamni sogllech monis borea monache asonant  haka lagun vaitt ani  noxtti kornni tea  adarunk pavum yetat. Tankam lagun soglleanchem nanv ibadd zaunk pavta. Sanathan sonvsthechea mon'xamni kel'lem bomb sfottachem ghatki kam' bestench bhogxi mhonnpak zainam. Tachea gunneanvkareak nitik ubho kelear kainch vaitt nam.
Goyant vaitt monachim mon'xam bhitor sorlolim asat ani kitleo sortat tem amchean odmas korunk zaina. Fattlea disamni Ponnjent dogam mon'xancher disa uzvadda khuni hol'lo kelo. Khuni mon'xank bexttich suttka dilear vo ogem ravlear upkarona, punn tanchi favo te porim nit zaunkuch zai.  Toxem korina zalear magir kosli poristhiti amcher uprasot tem sangunk zaina.
Khunn choryo ,zhogddim zhuzam Gõyant vaddot asat.
Osleo marekar ghoddnneo vattaunk goroz asa. Chukloleank bhogsunk zai tacher hanv virodh korinam, punn nitichi goroz asa mhonn sangunk sodtam.

NOEL DE SOUZA, SALIGANV
Ban'navlechea Koborddanche Thevoy
PANTALEAO FERNANDES
Modlea vorgachea Kristi ghorabeant cheddvachea kazari jivitachi toyari chalu astana, voklechim ghorchim, tannem fuddarak vaporche khatir denneachea rupan sabar vostu ditat. Tantuntli ek vost mhollear kobordd. Hem kobordd sabar pavtti pon'nsachea lakddachem kel'lem asta. Kolatmok ritin toyar kelolea hea koborddan choddxe pavtti Ban'navlechea poramporik thevoyamni kel'lim astat. Francis Fernandes ho Ban'navlecho nanvosto thevoy. Tachea koborddank, kherit bhaxen kazaranchea kallar bhouch promannan lok sodunk bhonvtat. Lhan pirayeruch aplea bapaik mozot kortana tannem thevoyponnache gunn apnnaile. Sokallchea vellar to iskolant vetalo, zalear sanjechea vellar bapaik tachea thevoyponnachea  vavrant mozot kortalo. Baravi xikun zata mhonnosor Francis ek boroso thevoy zalo. “Mhojea bapai thaim anik thevoyponnacho vavr korunk ghoddona dekun, hanvem mhojem xikop bond korchem poddlem. Tea bhair, mhaka teg bhoinni asleo ani tanchea fuddara khatir-ui hanvem zoddpachi goroz asli. Tea vellar hanvem ttuixonam  gheunk suru kelim ani vell mellta tednam thevoyponnacho vavr kortalom.” Oxea vellar Francisachea darar ek sondi ubi zali. Thevoyponnacho vavr korunk  Saudi Arabiant ek nokri asli. Tannem he nokre khatir mulakhat dili tednam tachi thevoyponnantli huxarkay polleun taka he nokre khatir adari mhunn vinchun kaddlo. Tache xikxonnik patrtaye khatir taka kocherint nokri diunk utor dilem. “Punn hanv Saudi Arabiant pavtoch mhaka nokrek lailolo to monis nokri soddun gelo ani tachea zagear hanvem vavr korcho poddlo ani hanv niraxi zalom. Punn mhoje gunn polleun, mhaka pongddacho dhoni, ani uprant 'supervisor' kelo. Mhojem pagar vaddtoch hanvem mhojea bhoinnank kazar kelim, ghor bandlem ani kam' soddun ghora portolom.” Tea uprant Francis kazar zalo ani uprant to dogam bhurgeancho  bapui zalo. Saudi Arabiantlea onnbhovacher adarun tannem bhouch sompeponnan Gõyant ganv-ghor aplem dukon ugoddlem. Aiz tache hata khal sabar thevoy asat ani kednam-kednam to tanchea vangdda kam' korta. To  koborddam xivay, ghorant dovorpacheo moderacheo anik-ui vostu toyar korta. Tachea moderachea dukonant daram ani zonelam legit toyar kortat. “Lakudd vaporche poilim tem borench tizom porian ravtam. Oxem kelear moderak kidd kainch lagona. Pavsant-gimant moder ankuddta tem zaina zaunk-ui teo-teo vostu vaprun hanv zotnay ghetam.
Lok kobordda khatir 25 te 35 hozar legit duddu farik korunk fattim zaina, punn kobordd borem korunk sangtat. Tujem giraik porot tujexim ailolem zai zalear, tankam dorjedar vavr korun bori vost diunk zai hoch mhojea yesacho ghutt,” tannem sanglem.
Page 1
 

 
 
(c) All Rights Reserved 2009. Ixtt . Designed and Developed by Graffitisys..