Abhijit Prabhudessai ho vevsayen elektral izner. Punn halinchea kallar to Gõykaranchi jevnna boxi samballunk- rakhunk pengott bandun vavurta. Tachech yeuzonnen 'Gõychea Xetkareancho Ekvott' (GXE) ghoddon aila. Aiz jevnnachi ji mhargay choddlea ti amchech chukik dolle ugte korpa khatir zalea, oxem mhonnit anik khubxeo gozali to Bosco de Souza Eremita-k sangta.
Gõy rajya thaim jevnnachem ani udkachem unneponn sonsunk zaunchem na tem polleun, bhailea rajyantlo lok apo-ap Gõy soddun vetoleachem chitr Abhijitak aplea dolleam somor dista. Zomin lokancheo, ani kherit bhaxen dongri vattarant ravtoleanchea dispott'ttea girasacheo gorzo bagoiteleo mhunn dakounche bodlek, ti vikun faido zoddpachi vost mhunn dakoll kel'lean aichi hi poristhiti nirmann zalea.
Rajyant udkachem produxonn (pollution) zalam astana-i udok mellpacher vo jevnnache surokxecher azun-ui vichar- obheas korunk na.
Udyog-karkhanne ube korche khatir, unne nodrechim ani svarthi rupachim sorkari dhoronnam dongracheea unchlea-voilea tenkxeanchem ani nitoll-nivoll udkachea zhorinchem nisonnton korun soddtat. Amchea purvozamni dongrache tenkxer ghoram bandunk kednach porvangi diunk na. Punn aiz, amchea purvozanchi ti zannvay svarthi mon'xamni aplea vhoddponnache axe pondak puroilea.
Sorkarache faltur yeuzonnek lagun, ani sorkar vhoddlim- vhoddlim hospitalam ani her prokolp bandchea nanvan lokachim xetam apnnaita ani tim padd korta. Hem polleun Julai 2009 'Gõychea Xetkareancho Ekvott' zolmak ailo. Itlench nhoi, tor bhailo lok zo Gõyant bekaideacho asro ubo korun ravtalo, tancheo bandavolli halinch moddleat. Hea lokak porot asro diunk Gõychea magas lokacheo zomni apnnaunk Gõychea odhikareanche tokler, ontoskorn’n vikun khailoleachem bhut boslam. 2011 Prantik Yeuzonne-ntlean sorkar Gõyantle khubxe zage udyogik, vevsaik, minachea ani turizmachea dhondea khatir vaprunk sodta tem polleun, xetkareancho ekvott zull'llo ani tannim sorkarache zomin apnnaupache khotte yeuzonnecher danddo marlo. Sod’deak GXE-ache anik 50 up-zome asat ani soglle mellun Gõy rajyant tache don hozar vangddi asat.
Gõyant xetkamotak vav na hem Abhijit mandun gheunk raji na. “Hem chintop sarkem na. Aiz Gõyant xetkamotak vav asa,” oxem sangun aiz xetkamotantlean utpon'n kel'lea vostunk kitli magnni ani mol asa tacher to mon oddta. Itlim vorsam, Amriken jevnnachem mol unnem dovorlelem, ani Amerikan sorkari dhoro-nnam 90 tok'ke 'subsidy' ditalim. Atam Ameriken sonvsarbhor zomin apnna-ilea ani mol vaddoupache toyarent asa. Sonvsarantli pikavollin girest korpachi tank asleli zomin apnnaun, Amerika atam he zomnicher khuinchim biyam rovchim tachem-i dhoniponn apnna thaim rakhun dovorpacho khottpott korta. Toxem kelear, xetkareank misoll biyam khatir porot-porot Amerikechem dar khottkho-ttaunchem poddtelem hachi tankam khobor asa ani toxem zal’lem tankam zai. Punn he faskent Bharoti xetkareank mol diunk na.
Xetki bhagak banda-vollichoch tenko nhoi, punn xetachea soimbik gun-nacher bhor diunk-ui sorkar chukla. Vokhdi gunnanchea zhaddancho rajyache GDP-int aspaunk na. Him vokhdi zhaddam-peddam rakhunk sorkaran matui panvl ubarunk na. Na tor rajyachi hi uncheli girestkay surokxit dovrunk jahir kortele asle, oxea utramni Abhijitan aplem mot ugtailem.
Gõy rajyak ani tantuntlea lokak lagu zaupi sabar gozali sarkeo tharear ghalunk GXE zomea mukhar avhan asa. Dusre vatten, sorkar Munddkar Kaido, 'Land Revenue Code' ani Zomin Vaporacho Kaido sompo korunk vo bodlunk khottpott korta, tantuntlean zomnichem rupantor korunk chinta. Bandavolli, udyog-dhondeache karkhanne ani  konkrittache vattar ube zaunche khatir, kaideant eksarke bodol ghoddun haddpak sorkari panvddear halchali choltat.
Ji xetki zomin padd oxi mhunn somzun roinastana urlea ti rovche khatir GXE xetkareanche sabar klub ghoddun haddpacher dolle dovrun asa.
Aiz ji lagvodd kortat ti makodd, hot'ti ani her ran'votti zon’varam padd kortat tem Abhijit mandun gheta. Punn tech borabor to sorkari dhoronnant-ui chuk asa mhonnta. Roste, relvek zoddpi roste bandche khatir monis ranamni pavta ani ran’votti zon'varanche zage-ancher akromonn kortat tacho ho porinnam’ asa oxem tachem sangnnem. Ran’votti zon’varank lagun lagvoddichem luksonn zal'leank sorkaran bhorpay diupachi goroz to ugtaita.
Abhijitache sangnne pormannem, lokachea mul'leamni (values) zaupachi goroz asa. “Poristhiti ghoddum yeta tednam yukt tea vellar ho bodol boreach promannan ghoddtolo,” tannem sanglem.