Ponnje: Obsoeguch zalear nhoim, ponn herui lhan-vhodd obsoegam khatir ambulansichi seva zaitea gorzam khatir lokache sevek  24 voram toyar asta, oxem 108 kocherintle mukhel  odhikari Xmt. Pratishta Mudras V. Ixttachea potrkarak sanglem.
“Lokachea monant goir-somoz posorlolo asa, to mhonnlear, fokot obsoeguch zalear 108-ak fon korun apounk zai. Obsoeg ghoddlo zalear apounkuch poddta, hantunt dubhav na.  Tea xivai, anink zaite obghat ghoddtat. He obghat mhonnlear ghoravi hinvsa, 'eve teasing', maramari, lhan bhurgeancher onit, zhaddam katrop adi, adi sarkhe guneanv adartoleancher poryan tanchea adarak pavpak 108 ambulans 24 voram toyar asta,” oxem Mudras-an spoxtt kelem.
Junache 14-ver 2008 vorsa, EMRI sonvsthen Gõychea sorkara kodden korar kelo. Bharot desam bhitor Gõy  chovtem rajyo hi 108-achi seva suru korpant. Hangasor hi seva suru zal'leak lokak hacho bhorpur upeog ani faido zala mhonn mukhel montri Digambar Kamat-an jahir kelam.
2008 vorsa Setembr mhoineant thavn hi seva odhikrutponnim Gõyant chalu zalea. Tedna thavn atam meren 108 seve udexim 47,323 lokachea akantak hi seva pavlea ani tache udexim 4,019 mon'xanche jiv vanchleat mhonn Gõycho anik eklo odhikari Xri Sandip Sharma-n mahiti dili. “Tumchea ani xezarchea ghorant poryant konnui chor vo atak korunk ailo zalear, khoinchea-i vellar 108-ak fon korat, zabab diunk amchea kendrant 24 voram ek pulis odhikari hajir asta. Tea-tea zagear pulisanchi rakhonn dhaddpak ho odhikari tabortob upay ghetolo,” oxem Xri Sharma sangta.
“Gõyant sod'deak 108-a kodden 18 gaddyeo asat. Ut'tor Gõyant  ani  Dokxinn Gõyant 9. Gõyche mukhel ganv zoxem Vasku, Molem, Kepem, Kuddchoddem, Moddganv, Verna, Fonddeam, Usganv, Kankonn, Ponnje, Kalangutt, Mhapxem, Sanklle, Honda, Valpoi, Pednnea, Pornnea Gõyam hea ganvamni ek-ek 108 ambulans dovorlam,” oxem Xmti. Mudras-an sanglem.
Anik-ui char noveo ambulansi haddunk tharailam. Tantle ekechi halinch ugttavnni zalea ani ti Lottle ganvant dovorlea. He seve khatir dor disa 600 fon yetat. Tantle 30 tok'ke fon rosteancher zal'lea obsoegam vixim yetat, oxem Gõy vibhagacho Xri Sandip Sharma sangta.
Ak'khea Bharotant ghoddtole rosteam vele obsoeg pollelear Gõy chovtea zagear urta, oxem ho odhikari  mhonnta. Amchea 108 ambulansint 74 gorbest ostoreank hospitalant vhortana gaddyentuch teo porsut zaleat. Team ballkank ami “108 babies” nanvan pachartanv, oxem  Xri Sharma-n sanglem.
108 ambulansint soglle torechi suvidha asta. Piddevont hospitalant pavosor soglle torecho upchar tantunt dovorla ani onnbhovik dotor ani ap-vavurpi te-te gorje pormannem vapurtat. Uzo petton ghoddtelea obghatank fuddo korunk ambulansint 108 mon'xank toyar keleat. Tankam goroz tem sogllem proxikxonn dilam. Dekun uzo laglear poryan he  sevecho labh ghenvcho mhonn Xri Sharman kolloilem.
108 ambulans-achi khobor azun-ui Gõychea lokank  nam, dekun  hea vixim zagrutai haddpachi goroz asa. Gõyant he sevek  lokamcho tenko mell'la.  Hacho labh anikui lokak mellcho mhonn ami vavurtanv. 108 hi fukott seva. Gorjevontank ti pavta ani tacho bore toren vapor kelo zalear amchean bhorpur faido  kaddunk zatolo. Tantunt vavurpeank poryan ut'tejon ani urbha melltoli mhonn te sevecho labh ghetlele zantte Maria Fernandes-an sanglem.
Sod'deak 108-achi mukhel kocheri GMC-ichea adle librariche imarotint asa. Thoinch mahiti kendr, pulis khateache toxench her odhikari 24 voram astat.