Eleisanvanchea vellar amchea borea nagrikak ek prosn poddta. To prosn mhunnlear mot khoinchea umedvarak diunchem. Mhaka dista tea pormannem protek nagrikan aplo hok'k, mhonnllear aplem moladik mot, svotachem nhoi punn somazachem boreponn polloun, divop khub mhotvachem asa. Ami jea mon'xak mot ditanv tea mon'xa babtin bariksannen zanna zavpacho amcho ek hok'k asa. To monis boro vo vaitt asa tem amkam ami mot dinvche poilim kollpak zai.
 Umedvarachi mahiti
Heach khatir halinchea vorsamni “Election Commission” hannim ek kaido korun je monis eleisanvank ubhe ravtat tannim aplea jivita vhoir bariksannen porjek mahiti divop xeoktichem kelam. Hea kaidea pormannem umedvaran aplea kodde kitli girestkai asa, kitlim bhattam bensam asat, kitleo bhangaracheo vostu asat, kitlim mottoram asat, apleacher pulis khatean kitleo tokrari asat, adi., hem sogllem eka “affidavit' hache vorvim porjek porgott korpachem asa. Ponn porza hachi dakol gheta kai? Umedvaran dilea ti mahiti kosak lavn to sangta tem khorem vo fott hacher adharun mot konnank diunchem tem tharaita kai? Na! Hakach lagun chor, fotting ani nagovnne venchnnuko jiktat.
Gombhirtay: Khoreponnim mot divop lokxayecho ek mhotvacho bhag zaun asa. Ponn amchea durdoivan amche motdar hem mahan karia jitle gombhirtayen korunk zai aslem, titlem korinant. Hache, tache axek lagun, konnakui mot diun hea amchea povitr kortoveacho ami sarko durupeog kortanv. Amchea motacho durupeog zanvcho nhoi mhunn ami thodde punn upai gheunk gorjechem asa. He upai mhonnlear ami mot diunk sodhta to fuddari koso? Tacho sobhav koslo? To somajik seva kortolo vo aplea svartha khatir vavurtolo? Hea prosnnank zapo melloun ghetolo zalear sokol dileat tantuntle thodde ponn gunn tea fuddareachea angant aslole fuddari nivddun yevpache. He gunn kosle asa tacher nodor marum-ia:
 Umedvarache gunn
* Aplea kuttumba sovem tache sombondh kitem? Bail, bhurgim, avoi-bapui ani xapai-xamaim hanche thaim to koso vagta?
* Tachi bholaiki koxi asa? To suddsuddit vo allxi? * Amcho somaz mhonnlear torekvar sonskrutayeo, torekvar dhorm ani torekvar bhaso. To onek sonskrutayeo, dhorm ani bhaso hankam kosle nodren polleta? Tim ekvottachim ani mogachim vo rag ani duspottichim sadhnam mhonn somzota? * Lokxaycher  tacho bhorvanso asa vo na? Aplea utramni ani kornneamnim to lokxay raj khorench lokraj mhonn dakoll korta vo na? * To aplea kornneamni desa sovem mog dakhoita vo na? Amchea desachea fuddareancho taka obhiman asa vo na? Tache bhitor il'li punn desbhokti dista vo na? * Lokxayent apleak hok'k asat toxech aplea xezareakui asa mhonn to mandhun gheta vo na? Aplea xezaream lagim ken'naim kizil zalem zalear to koxem suttavem korta kai? Peleachem borem chintun vo aplo svarth dolleam somor dovrun? * Tache bhitor somajik zababdari asa vo na? To aplea ghorantlo koir khoim uddoita? Taka suknneank marpachi ani zhaddam katorpachi sonvoim asa? Niradhareancher podvedar lok onit adharta ten'na to kitem korta? Ogich thoimsorlo kus marta vo tea niradhareak adar diunk proitn korta? * Novem novem xikpak tache bhitor umed asa? Prosonga pormannem vagpak tache bhitor xeokti asa? * To Devak manta?
Umedvarachem chitr
Oxe he kaim prosn ami amkanch vincharun tea fuddareachea jivitacho obheas korop khub mhotvachem. He porim ami amchea fuddareancho obheas kelo zalear tachea jivitacheo zaiteo vaitt ani boreo kornneo amchea dolleam somor ubeo zatoleot, tacho sobhav kitem kat tacher amchem lokx oddtolem ani to fuddari amcho boro protinidhi zaum yeta vo na, ho zabab aminch amkam ditole.
Sompoitana..
Anik ek ami monant dhorchem poddtolem,  tem mhonnllear poile suvater ami sarke nisvarthi asche poddtole. He porim mot diupak dhir zai, thirponn ani promannikponn zai. Prot'tek nagrikan hea thirponnacho adar gheun promannikponnim aplem mot dilear, amkam   bore protinidhi melltole ani  somazachi udorgot vegan zatoli.