Nilofer D’Souza Jitle sovkasayen Bharotantlea nitisobhanchem kam'  chol'lam tem pollelear kexincho nikall lagtolo mhonnpacho kosloch bhorvanso na. Ho onnbhov nitidar V.V. Rao hannem kaideam vixim zalolea eka som'melonant aplea bhaxonnantlean ugtailo. Itleo sogott tokrareo kortimni poddloleo asat, teo fuddlim 320 vorsam meren teo suttaveo zait  kai? Oso proxn tannem hajir asloleam mukhar  kelo.
 Oxem-i  zaum yeta. Hangachi kaidea vevostha, kexi manddpeank todd-zodd pod'dot vaprun teo suttaveo korcheo mhonn suchoita. Hantuntli anik ek pod'dot mhonnlear tisrean modesti zaun tacher upay sodun kaddop.
  Modesti zatoleak koslech nem' nant. Ho modesti monis ek nitidar vo ek vorixtt vokil poryan asum yeta. Fokot taka todd-zodd korpacho gunn asunk zai. Ek pavtt kexint gunttlele donui bazu hea proyogantlean pasar zalea kai tankam xevottachea nirnnoya kodde pavpak 60 disanchi muzot ditat. Na zalear tanchi kex toxi tea-tea korttan veta. Agost 22ver, 2010 vorsa Suprim Korttan eke kexi vixim ek nem' pas kelolo. 1988 vorsa Assam-an ximechea proxnak lagun Nagalandacher kex ghal'li. Hi kex soddovpak konnui tisrea pokxak modesti zaun hi kex soddonvchi mhonnlelem.
   Ximecho vad asloli hi  poili kex zhoim, tisrea mon'xak modesti dovrun kex kabar korpak suchoil'lem. Tachea uprant kaim vorsamni osle 'Mediation' kendram Dil'li (2005) ani Bengllur 2007 vorsa sthaplolim, ani tim bore toren aplo vavr kortat. Sod'deak him kendram 30,969 kexi hatalltat ani 60% kexinim tankam labh favo zala. Fokot don mhoineanchea kallant 18,581 kexincho nikal lagla, na tor vorsanchim vorsam heo kexi korttimni lambovnner poddun astoleo asleo. Kex ghevn korttant vochop mhonnge khup zannank toklechi foddafodd. Taka lagun tisrea mon'xan modem ravun ti soddovpak ho ek boro upay. Dubav na todd-zodd korchi poddtelich.
  Vellachem mhotv lokxant dovorlear, keximni gunttlelea donui bazumni hacher upay kaddop gorjechem mhonn disun ailam. Hea vixim Banglorechea 'Mediator' kendrantli Laila Ollapally eke kexi vixim iskuttavn sangta. Eke avoi ani sune modem bhattank lagun kex choltali, te sunek tichea sorgest ghovan dovorlelim. Avoi somzol'li aple ut'tar pirayer aplo put apli kallji ghetolo mhonn. Punn tantlea eka bhattan apleak ravpa khatir ek ghor bandtali. Xekim tisro modest modem poddon  maim ani sun eka nirnnoyar pavlim, tem mhonnlear morosor avoi sune fuddean tichea ghorant ravtoli, ani dor mhoineak tika oddez hozar rupya pottgi mhonn ditoli. He osle torecho nirnnoy ghetlolean dogainchoi proxn bore bhaxen mittlo. Jedna ek vokil poryan tisrea mon'xak modem ghalun ti-ti kex soddoita, tedna taka pryan namna asta, karann lok mhonnta, tea vokilan kex vegim soddoilo mhonn.
  “Ami Bharotant US desa porim 'Mediation' pod'dot vapurpak fattim asat, karann vokil somzotat oxe torechi pod'dot vapurli zalear duddvam vatten luskonn zatolem mhonn” oxem Adavit Sethna mhonnta. Sod'deak hea 'mediation' korpeanchi 'fi' 15,000 tem 70,000 rupya asat.