Gel’lea vorsa Junhache 19ver, Jezuchea B.P. Kallzache Porbe disa suru kel’lem tem Padrim khatir bhettoil’lem Voros, onvdum  Junhache 11ver Roma xarant, Benedikt XVI Pap Saiban sumar 15,000 padrim, 80 Kardial ani 350 Arsebisp ani Bisp asun soho-bolidan bhettoun sompoilem. Hi sompadnni odik faideachi zaunk Junhache 9 – 11ver porian hea padrimnim Sompad-nnechea Mellaveant vantto ghetlo. Padrinchea Askari St. Zuanv Mary Vianneychea mornnachim 150 vorsam somorombhun, hem “Padrim khatir Voros” porghottlem te chittint Pap Saiban dakhoil’lem tea pormonnem hea Vorsacho hetu aslo soglleam padrim-nim aplem bhitorlem jivit odik  novsorunk ani aichea kallachea sonvsarant Xubh-vortomanache odik urbhevont govai zaunk upai gheunk.
Hea vorsant ak’khea sonvsarant ximpoddlolea Katolk bhavarteamnim padrim khatir khaxea goddlelim magnnim bhettoilim ani padrimnim aplea iadnikponnachea somorponna vixim barik-sannin niall kelo. Kherit magnnim zalim amchea igorzamnim, dharmik Sonvsthanchea somuda-yamnim ani bhavartean-chea ghorabeamnim. Sobar novsornneche kurs, xibiram, ani retir ghoddun haddle dor diosezint toxench raxttrik ani ontor-raxttrik mollar padrink soeg diun aplea padriponna-chem daiz vollkhun gheunk ani, koslea-i munniar-ponnachi zababdari Devache Soddvonneche Ievzonnent tankam dilea tantum, Devache Porjechi seva korchem mon thiraunk. Internet-a voilean khasgi Websites ugddun ak’khea sonvsarant ximpoddloleam padrink ekvottun tanchea padriponnachea somor-ponna ani zababdariam vixim odik kholayen bhasabhas korunk anik-ui soeg ani sompeponnam mell’lim.
Punn hem voros lojen, khontin ani kanttallean bhorlolem-i zalem, karonn padrimnim ani Bispamni poryan sobar bhailea desamnim tornatteancho linga durupiog kel’leo kexi eka pattlean ek voir sorleo. Toxench thoddeam Bispam-nim ani Kardialamnim poryan oslo durupiog kel’leam padrink asro dilo mhonn-ui voir sorlem. Hea pasot zaiteamnim bhou korun loukikamnim aplem vittel’lem add mon dakhoun nixed marlo. Toxench, hi onit sosunk poddloleamnim Kortimnim kexi ghaleo ani bhou vhodd farikponn magun, koxe-i toren vankdde vagleat tannim tanchi zutti soddun diunk maglem. He baptint, kaim niropradhi padrink, tancher oslem boglantt aslem mhunn, munniarponnachi zutti ani hok’k mone kel’le, te azun apnnak nit magtat ani aplem nanv ibaddlam tem ani apli zutti porti melltoli mhunn axeun ravtat. Zuanv Paul II ani Benedikt XVI Pap Saibancher-ui boglanttam poddlim, tannim-i Pap Saib zaunche adim oslea ek vo dog padrink asro dil’lo mhunn. Dekhun atanchea Pap Saiban apli zutti soddun diunchi ani adlea Pap Saibak Bhoktivont mhunn manun gheunk ‘proses’  suru kela to bond dovorcho mhonn bhasabhas zali. Hea goddboddant osle add vakhe polleun zaiteam Katolkancho padrincher ani Igorjecher visvas hal’lo ani tim Katolk Igorjentlim bhair sorlim.Kedo vhoddlo dopko Povitr Sobhek, Padriponnak ani tanchea  Nirmollponnak! Tor hem voros sarkench add porinnamachem zalem kai? Niraxi zaun padrimnim aplem iadnikponn soddun diunchem kai? Jezun iadnikank Igorjeche khambe kel’le. Dekhun Padri nant zalear, Igorz  choltoli koxi? Mhonntoch, itlean Kristi dhormachem nisontonn zaunchem kai? – Zaiteanchea monant he ani osle vichar gunvleat. Hacher niall korun Benedikt XVI Pap Saiban Iadnikanchea Vorsa Sompadnnechea Misar Sermanv kelo ani kaim Kardialamnim-i he Sompadnnechea Mellavea somoyar heam vicharank zabab dile te ami soglleamnim, ak’khe Povitr Sobhen, sodanch monant dovrunk favo, karonn te padrinchim patkam vittetat punn Iadnikponnachi goroz ani vorteponn dakhoitat. Tancho hanv anga atthap ditam. Poile svater, sobar padrimnim amchea lhan bhavam vixim lingacho dur upiog korun aplem iadnikponn boxttailam ani tachem khorem rup soddun  add rup dilam ani patok kelam mhunn manun gheun Pap Saiban tanchea ani ak’khe Povitr Sobhechea nanvan Deva lagim ani onit sonsunk poddloleam lagim sobhemazar mafi magli ani fuddarak oslim patkam na zaunk ghoddta titlem-i korunk bhasailem: “amche lagim ghoddta titlem-i ami kortoleanv tanchea apovnneache khatrechi chovkoxi korunk ani goroz te proitn korunk tanchea iadnikponnachea jivitache zatrent tankam sangat korunk,he porim duspottaitoleam mollamnim ani jivitachea vignamnim Dhonian tankam samballunk ani tancher aplo dollo dovrunk”. Hantlean hea patkachi vikottai kitli vhodd ti manun ghetli.
2.  Padrinchea patki jivitacher niall korun hem thavem zata:iadnikponn  “Devachem dennem ‘matyechea aidonnamnim’ lipoil’lem, jim sodanch ani sogllo vell, mon’xancheam oskotayam modem hea sonvsarant Devacho mog distea rupan hajir kortat”.
3. Iadnikponn Devak sonvsarant hajir korunk chodd gorjechem. Devachea ani mon’xan-chea“dusmanak” iadnik-ponn porzoll’lolem naka. Taka tem nakach.
4. Padrink bhettoil’lea vorsa ghoddlam tem ami hech nodren polleunk favo.  Hea vorsa Iadnikponna-chea vhoddponnacher ani vorteponnacher niall korun Iadnikponnacho Sonvskar, soglleamnim apurbai korunk, voir ubharcho aslo, punn kaim iadnikanchim patkank lagun iadnikponn-acher kupam ailim.  Padrinchem kam’ mhonnlear lhananchea boreponna pasot Devacho usko porzollaunk, punn te boldek, bhou korun lhanam vixim lingacho durupiog korun,tannim  iadnikponn-acher lojechim kupam haddlim ani padrincher bhavarteancho ani lokacho visvas denvlo. Oslem patok kel’le padri sonvsarantlea padrinchea ankddeak soiri kelear (xemboreant fokot 4 zann)punn padriponnacher khot ghalun ekach padrin  oslem patok kelam mhunn sobhemazar soglleam padrincher tem kallem khot bostach,ani aichea somazant, bhou korun lok somporkache upai vaprun tem khot odikuch kallem korun dakhoil’lean iadnikponnak bhov vhodd dopko boslo ani soglleam padrimnim apli man bagaunchi poddli.
5.  Tori-i, Devachea doyallponnan ani kurpen, heam padrincheam patkanche savllek lagun Padrinchea Vorsacho hetu xat’ti pavo nastana urunk na. Khorench mhollear to dusrech toren xat’ti pavlo. Padrinchea Vorsa ami padrinchea vavrachi tust korun turtuti gazoiloli zalear  ani hi tallni amkam sodanch asa – ami boddayen bhorlole zatole asleanv ani amchi khori novsornni zaunk pavchi nasli. Punn kitem ghoddlam tantlean khalteponnim ani dhin’vasnnechea umalleamnim amchi oskotai ami vollkhunk pavleanv, khoreponnim ami ‘matiechim aidonnam’ mhunn manun gheunk pavleanv, dekhunuch amchea patkanchea nimitan Devachem dennem ani Devachem boll porzoll’lem. Khorench, dor ek padri ani soglle padri borem kortat tem tanchea bollan te korinant ani tem tanche vhoddvikek nhoi punn Devache mhoimek, karonn tem sogott teach Devachem funkott dennem.
6.  Ho padrinchea patkancho iskandl zaun asa ek Devacho ulo amchi bhitorli xudh’di korunk ani hi xudh’di amchem dispottem karya koxem chalu dovrunk ani tantlean hem Devachem vhoddlem dennem ami ghetlam tem manun gheunk ani mogan vengounk. Benedikt XVI Pap Saibache Irlandachea Katolk bhavarteank boroil’le Gonvllik Chittintlo ho zabab “Secretary of State”, Kardial Bertone-hannem amche mukhar manddlo: “He dukhintlean Devanuch nirmiloli zannvay amkam yeta. ‘Novea zolmacho ani otmik novsornnecho ek kall’ ami jiyeunk goroz asa, ‘kalljidarponnan kallza-monachem bodlop, xudh’di ani sondanachi vatt’ dhorunk, ‘Igorjek ekvottun Jezu lagim ixtta-gotichi suropai ani girestkai tornnatteank pavounk nove upai sodunk ”
7. Iadnikponnachem vhoddponn oxem porzollta: Padriponnache Ordiche makhnnent lipoilolem khorem vhoddponn asa tem Devacho okondd visvas (audacity) dakhoita, karonn amchi osoktai zanna zaun “mon’xanchean Deva nanvan ani Deva svater ubho ravunk xokta mhunn Dev manun gheta”. ‘Iadnik’ utrant liplolo asa to Devacho visvas zaun asa Tachem khorem vhoddponn. Hea visvasan Dev aplem kam’ korunk mon’xank apoita ani eke bhaxen apnnakuch bhitorlean tankam bandta. Hea Padrink bhettoilolea Vorsa hem ami niallunk sodtaleanv ani novean apurbayen chakunk axetaleanv.“Padri mhollear…chalto zutti choloupi nhoi. Portench, to kitem korta tem khuincheach mon’xachean apleach bollan korunk zaina: Kristachea nanvan to utram uloita tim amchim patkam bhogxitat ani he porim to, Deva thaun suru korun, amchem ak’khem jivit bodolta. Unddea-soreachea danancher to Kristachim dhin’vasnne-chim utram uloita, sar bodolpachim sonvskarnne-chim utram tim – him utram Kristak porxim hajir kortat, Punorjivont zal’lo Jezu, Tachi Kudd ani Rogot – him utram he porim hea sonvsarantleo vostu bodoltat, teo sonvsar Devak ugto kortat ani Taka ekvottaitat”. Hea pasot, padrimnim apunn kitem kortat tem Kristachea nanvan ani tache svater kortat mhunn monant dhorunk bhou gorjechem mhunn Quebec Arkidiosezicho Kardial Ouellet-an ugddas kelo. Dev upiog korta “amcho, osokt mon’xancho, amche udexim hajir zaunk soglleam dadleank ani bailank”. Mhonntoch, iadnikponn ek “zutti” (office) nhoi punn sonvskar: Dev durboll mon’xancho upiog korta, amche udexim soglleam dadleank ani bailank hajir zaunk ani tancheo gorzo xat’ti pavounk. Dekhunuch, Dev amkam itlo lagim asa tem polleun ami sontosbhorit zatanv, ani amcheam oskotayamcher porian to visvas dovorta ani dispottim amkam choloita ani samballta mhunn amcho dhin’vas porgott’tanv.
8.  Misar vapurlolem Stotr 23(22) gheun Pap Saiban anik don sotam uzvaddailim:
A. “Mhozo Gonvlli Sorvespor, kãich mhaka unnem zaunk na!” Hea stotrant Dev aponn Izraelacho Gonvlli mhunn aplich prokasnni korta tem Izrael porjen manun ghetlem ani aplem jivit Devachea hatant soddlem Taka zai toxem tem cholounk. Hea stotrantlean, Izraela borobor ami amchi khuxalkai ani dhin’vasnni porgott’tanv, karonn Dev muniskullak hajir zata ani muniskulla vixim usko dakhoita. Dusrea utramnim, Dev porxim mhozo usko dhorta, amcho usko dhorta, sogllea muniskullacho usko dhorta. Dekhun, aiz ho tacho usko tache porje sovem dakhounk Devak ami iadnik zai. Mhonntoch, padri koxe aiz ami ho Devacho usko dakhoitole munis zaunk sodtanv soglleam mon’xam sovem, dadleam toxem bailam sovem, tancho samball kortole ani hea Devachea uskeacho onnbhov ditole. Dekhunuch, padri koso koslem-i munniarponn mhaka dilam thuim mhojean Deva borobor mhunnunk zaunk favo: ‘hanv mhojea xelliank vollkhotam ani mhojeo xellio mhaka vollkhotat.’ Pap Saibanuch hea utrancho khoro somoz-ui dakhoilo. Povitr Pustokant ‘Vollkhunk’ hea utrachi somzonni bextti, bhaili vollokh nhoi. ‘Vollkhunk’ mhollear dusrea mon’xak bhitorlean lagim zaunk. Tacho orth zaun asa tacho vo ticho mog korunk. Dekhun ami dadleank ani bailank Dev ‘vollkhota’ te porim ani Deva pasot vollkhunk vavrunk zai; Devache ixttaghotichea margan ami tanchea sangata bhonvonk vavrunk zai.
B. “Tuzo danddo ani konkem mhaka buzvonn ditat”: ranvotti zonvaram xellianche fattik lagtat tedna eka gonvlliak danddeachi goroz asro koso; toxench chorank dhanvddaunk te apleam boliank polleun bhonvtat tedna. Choltana addkollinche panvdde sampoddtat tedna tenko gheunk danddea borobor konkeachi-i goroz poddta. Igorjen gonvlliachea danddeacho upiog korunk zai bhavartachim sotam rakhun dovrunk, tancher vankddo somoz ghaltat tedna ani bhavarteank guspagonddollak ghalun vankdde vatten vhortat tedna. Danddeacho upiog oslea vellar khorench mogachi seva zata.
9. He porim, bhou korun hea vorsa, anik ekdam amcheam tornnatteank thavem zaunk favo aslem ki hem apovnnem, hem sevechem sangatiponn Deva pasot ani Deva thaim, asa – khorench Dev ravta ami taka ‘hoi’ mhonntoleanv mhunn. Dekhun, padrimnim toxench ak’khe Povitr Sobhen Deva lagim hem apovnnem magunk zai. Devachea molleant vavraddi dhadd mhunn magonk zai. “Dev mhozo, amcho, ak’khea muniskullacho porxim sambhall korta. Dev mhaka ollkhota ani mhozo usko dhorta. Devak ami padri zai, ithiasache eke lhan goddiek, porje sovem tacho usko amche vorvim dakhounk”.
Hem monant dhorun, Pap Saiban hem Voros Padrim khatir bhettoitana vixoi ghetlolo toch ami aiz khuxalkaien amchea tornnateam fuddem dovortanv: “Visvaxiponn Kristachem, Visvaxiponn Iadnikanchem”. Ani hea nimitan tannem padrink boroil’lem tench amchea tornnatteank sangtanv: ‘Mogall tornnatteamno, Jezu tumkam ravta. Ars firgojechea Vigaracheam pavlancher nodor ghalun tumi tache-xim voddon ieum. Oxe toren, tumim-i zaunk pavtoleat amchea kallachea sonvsarak, dut bhorvanxeache, sondanache ani xantiche!’
10. Dekhunuch, Kardial Antonio Cañizares Llovera, Vatikani “Congregation for Worship and Sacraments” hachea Sorv-Vhoddilan hea somoiar uloun oso niall kelo: “Padri Krista sarko zaunk zai. To bhagevont zaunk zai. Iadnikanchem bhagevontponn bhailean addail’li goroz nhoi, ti zaun asa goroz amchea apounneachi”.
Fuddem uloun tannem mhollem: Hem Voros “eka vhodd sonvsarbor tufana modem padrincheo osoktaio voir kaddun monoilem”; tori-i padri bhou vhoddlem dennem mhunn manun gheunk savlli poddonk na. “Padri zaun asat Devachem dennem mon’xank” ani “te teach Kristak bhettoitat zo zaun asa Vatt, Sot ani Jivit, amchim pavlam uzvaddaitolo Uzvadd, xim-mer naslolo ani moro porian mog kortolo Mog”. Ani Kardial Lloveran oxi budh dili: “Xubh-Vortomanachea aughodd vaura fuddeant dubhavnakat. Amchem iadniki jivit faideachem; amchi goroz asa. Dhir gheiat! Chantt fuddem!”
11.  Pap Saibacho “Secretary of State” Kardial Tarcisio Bertone-hannem padrinchea magnnea ani nirmollponna vixim uloun mhollem: “Padri, aplea nirmollponnachi sobitai kholaien jieunk, poile svater, magnneacho munis zaunkuch zai. Iadnikanchem nirmollponn zaun asa ek khunna ani teach borobor voddni (stimulus) gonvllik mogachi ani kherit zhor sonvsarant sufollponnachi. Iadnikachem nirmollponn dor eka mon’xak Jezunt aplo bhav vo apli bhoinn mhunn manun gheun udarponnan seva korchem rup kholaien dakhoita”. Dusream utramnim, padri zaun asat bhavam-bhoinnim modem bhav – bhav dor ek munis dadleacho ani dor ek munis bhailecho ani apnnakuch visrun tancho to mogan seva korta, tankam voddon vo lagon ravonastana (detached) ani aplo faido pollenastana. Hem nialltana amchea “Goa Mission Congress”-achea mukhel vixoyacho mhaka ugddas ieta: “Jezuchea Mogachea ujean Devacho mog ximpdaum-ia”.
12. Kardial Cláudio Hummes, “Congregation for the Clergy” hachea Sorv-Vhoddilan Padrink bhettoil’lea Vorsacho anik ek hetu amche mukhar manddlo: Hem Voros zaunk zai aslem ek soeg padrimnim Igorjechi Dhorm Porghottnechi Zababdari novean ollkhun gheunk. Padrincho ho ek usko zaunk zai azun Jezuk ollkhonant vo Jezuk soddun gheleant tanche sovem. Heam donui torecheam mon’xank Jezuchea mogachi goddsann chakunk diunk tannem aplea jivitantlean Jezuk hajir korunk goroz. Kardial Hummes-an fuddem sanglem “aplem apovnnem ani muniarponn jieunk ani fuddem vhoronk Devachem Utor, Povitr Misachi bhett, ani magnnem Padriche upai zatat.”
13. Mis sompounchea adim, Pap Saiban ak’khea sonvsarantlea padrink Saibinn Mainchea gopant ghatle tiche lagim magun padri tanchea “bhou vortea apovnneak” sobta tosle zaunk ani “Vaittoveachea bhullovnneantle” tankam rakonk