Goychem daiz chorunk toyar asat. Konnachem chorlam tankanch dukh lagta. Mhojem nhoi zalear mhaka kiteak poddlam, oslea chintpak lagun Goychem nisonttonn zait veta. Halinch Pornneam Goyant aslolea museum-antleo bhangarachea daizacheo char vostu chorleo. Hea vostunchem mol kruttamni zata mhonn odmas kortat. Hea ghoddnne vixim Goyant zaito boball cholta. Punn anink thoddea disamni konnuch tachi khobor korchona. Kiteak tem amchem daiz mhunn mandun gheupi Goykar azun nident bhormeta. Ani zagrut aslolo monis tem sogllem apnnachem korunk zainam mhunn niraxi zata. Goychea sorkarak Goychea daizachem poddunk na fokot aplem khas daiz vaddounk te vavurtat mhonn tancher arop poddot asa.
Goyant asa tem amchem soglleanchem daiz oxem mhonnpacho somoz Goykaram modem yeta mhunnosor Goychem daiz kobar zaun vetolem, ani plastik amchem daiz zaun soglleak distti poddtolem. Rusiecho lok apunn Gõykar mhunn hok'k gheun sangtolo, ani amchench daiz sonvsarant kruttamni duddu disun vikrek haddunk lagtole. Zoxem Tipu Sultanachi torsad, Khoinoor ani heri itihasik daizachea vostum vixim zalem toxem zatolem mhonn dubhav na.
Punn hem eke torechem daiz. Zaka bazarant mol asa ani itihasant fanki zalam. Daiz nhoich fokot bhangaracheo ani rupeacheo vostu punn amchi xristti ani vattavoronn. Goyant atam 'free space' meklli zomin disunk kotthin zata. Konna-konnacho dollo oslea zomnincher asa. Sogllea suvatancher bandavolleo itle taktin choltat, ki fuddarak amche sorbhonvtim xitoll vattavoronn, pachvi char amkam dispachi axa na.
Minanchea tontteak lagun Goychem 'green cover' unnem zait veta. Ani min bond zaunchi fokot axa urlea. Tem nettan cholta tea pormannem tem bond zalear ek oronnem (desert) korun uddoilear konn porva korcho na. Hea mannkullea Goyant azunn min vikhunuch duddu korum yeta toslo urla?
Amchem purvillem daiz samballunk amchi kherit zababdari. Hem daiz amchea purvozamni amkam dovorlam. Amkam hea daizachem ut'tom toren mol kollona zaun tem ami vikunk kaddlam. Toxench amkam daizachem khorem mol kollona zaun, ami hea daizachi beporva kelea ani lok tem chorunk lagla.
Amkam dor ekleak koslem karya asa? Tem fokot nivddun kaddloleanuch vo nemloleanuch tem daiz samballchem? Tachi zotnay konnemn gheupachi? Goykarak fokot ho ek proxn. Hacho zobab ditolo kiteak na. Osli amchi poristhiti zalea. Amkam chortat, toripunn mhaka kiteak poddlam; mhaka thodde duddu melltat te puro vo mhojim thoddim kaidea bhailim kamam sompim zatat tem puro.
Ami zaite pavtti amchim bottam sorkarak vo politicinank dakhounk ogim ravtanv. Punn Goyant toxench Bharotant politician fokot fottinnponnachem rup. Monis aplo faido polleun, politicianachea adaran, kaidea bhair kamam kortat. Panchayatin kel'lim illegal kamam polliticianachea asrea khal lok samballun dovrunk sodta. Daizachem mar zok, mhojem illegal durig ani ghor moddunk favona. |
