Ami kitem sodtanv tachi amkam azun khatri na oxem dista vo ami sodtanv tem amkam unch molachem; tea pasot ami jiv diunk toyar zatanv. Zor amchea jivitant poixe unchamolache zalear ami poixam pasot kitem-i korunk toyar zatanv. Eka tthevea sarkem kitem unchlem ani vortem (like a treasure) tem vollkhunk amkam khup nennarponn asa mhunnum yeta.
Lipoun dovorlolea ttheveache ani motyache voparicho ugddas yeta. Oxem-i Sorgichem Raj mhonn somzat: eka xetant ek tthevo lipoil'lo aslo; konn-eklea mon'xak to mell'lo; hannem novean to lipoun dovorlo, ani khuxal zaun to gelo, magir apnna kodde aslem titlem-i tannem viklem ani tem xet viktem ghetlem. Tech porim Sorginchem Raj koslem tem sangta: konn-ek veapari nazuk motiyam sodunk bhonvtalo. Ek unch molachem motim taka melltoch, to gelo, apnna kodde aslem titlem-i tannem viklem ani tem motim viktem ghetlem. (Mt 13:44-46)
Ttheveache voparin jea mon'xak tthevo melltta to khuxal zaun veta. Amkam tthevo mellunk poile suvater ami amchea jivitache ttheve sodunk goroz. Chodd ani chodd mon'xacho tthevo poixe zaunk lagla. Tthevo melltoch to monis veta ani aplem kitem aslem tem vikun odik duddu zoddunk axeta.
Duddvamni mon'xachea jivitant vortea ttheveacho zago ghetoch, amcho Dev-dhorm ani monisponn ani somajik totvam poryan ami vikunk pavtanv ani duddu komaunk bhonvtanv.Bhroxttachar ani lonch - Corruption, bribery ani dusreank domaun ami duddu komaitanv; hem sogllem amkam sarkem koxem dista kiteak ami duddvank amcho tthevo koso apnnaitanv.
Poile suvater jivitachim totvam ami vikunk toyar zatanv. Dusre vatten pollelear, amchea jivitant amkam duddu korunk addkoll uprasta tednam ami ghunngunnunk lagtanv. Ghungunnponnak zor pogar aslo zalear ami rat ani dis vavr kortolim asleanv. Sompnant poryan thoddim ghunngunntat. Eke toren ghunngunnponn Gõyant duves koso zala. Kainch borem yeunchem na, ani kednanch borem zaunchem na oslea noxean Gõykar jiyetat. Ghunngunnponn kiteak soddchem hacher ami zaitem aikolam. Punn amchea jivitache ttheve bodlit zalear nhoich ghunngunnponn ami bodoltoleanv bogor onek novi sôd nirmann zatoli.
Amchea jivitant bodol zatolo zalear ami kitem sodtanv tem bodlunk goroz.
Amchem ogeponn, niz Gõykarachem kalliz dukhoita. Ami ogi kiteak asanv? Kiteak amcho tthevo Gõychea faideacho zaina. Ami ogi kiteak asanv? Kiteak amcho tthevo amchea ganvchea faideacho nhoi. Ami ogi kiteak asanv? Kiteak odik vortea ani unchamolachea ttheveanchi sôd ami bond kelea.
Amchi khuxalkay amchea ttheveacher dhorloli asa. Koslo zait amcho tthevo? Thoddo vell kaddun konn dusre ttheve sodta ani dusre molache ttheve punzavunk aplem sogllem vikunk toyar zata tanchem ami aikunk faideachem zatolem. Dhadoskay ttheveacher asa tem khorem punn khori dhadoskay vortea ani unchlea ttheveachi yeta ti chaklear, duddu udok koxe zaunk lagtat. Udok-ui nhoi, kiteak udok unnem zait veta punn kochro koso zatat. |
