Sankvalle Bhag. Juze Vazachim
Novenam ani Porob
Sankvalle: Bhag. Juze Vazache Sanktuarint Janerache 7ver tem 15ver novenam ani 16ver dobajik Porob. Novenan-chea disamni Misam sokallim 6.30 ,8.30 ani sanje 5 vaztam. Janerache 9ver Dis bhor Porom’ Sonvskarak Nomoskar sokallim 9.30 tem sanje 4 vaztam. ani Ratchea 10 vaztam Ratchem Zagronn suru zatolem tem dusre sokallim 5.30 vaztam somptolem. Janerache 11ver Aitaradis Misam sokallim 6.30, 7.30, 9.00 Piddevontam khatir kherit Mis ani sanje 5 vaztam. Janerache 13ver Retir sokallim 9.30 tem sanje 4.30 vaztam. Janerache 16ver Porbe disa Misam sokallim 5, 6, 7, 8. Dobajik Sangatim Mis 10 vaztam, Mha Gonvlli-Bap Filipe Neri Ferrao bhettoitolo. Don’param Oratorichea kuddant 12 vaztam Mis. 1.30 vaztam Sinhalese bhaxen, sanje 4 ani 5.30 vaztam Misam astolim. Soglleamni bhag gheun-cho mhonn Sanktuaricho vhoddil magta.
Antarctica pongodd Vaskuchean bhair sorlo
Vasku: Antarctica hea borfa khonddant odik kholayen obheas korpak Dezembrache 31ver bhair sorlo. Gõychea mukhel Coast Guard DIG M. S. Dangi-n bott bhair sorli. Dr. Pradeep Malhotrachea fuddariponna khal ho vidvanacho 28vo pongodd Antarcticache vattek laglo. Hea pongddant 74 vangddi asat; voiz, izner, vidneanxastri ani her zannar geleat. Ek pongodd vimanantlean Cape Town-anlean gela, dusro pongodd doriantlean gela. Bharotant Antarctikant aplem sorvankallachem sthan manddlolem asa. Fattlea kaim vorsank thavn Antarcticachea ostomte vattarnt 2 digri celsius odik vaddlea, tache voir amche vidneanxastri aplo obheas kortole ani borof kiteak pigollta ani havoman kiteak bodolta tem polletole, oxem National Centre for Antarctica and Ocean Research (NCAOR) hacho Son’chalok Dr. Rasik Ravindran sanglam..
Kollem gonvlleamni
Natalam somarombhlim
Belea nogrant zolmol’lo Ballok Jezu poilo khedde ganvantlea gorib gonvlleank mell’lo, nhoi xarantlea vhoddlea mon’xank. Pilarche Sonvsthechi Novisiad Kollem ganvant asa, thoim xiktole bhurge dor vorsa Kollenchea gonnli vattarantlea gorib lokak Natalanche porbe disa sabar toreche khell kortat. Hea vorsa Pri. Joseph Baptista ani Pri. Thomas Rodrigues hanchea sohokaran Novisiadichea ghora bhonvtim aslolea sumar 300 lokak Natalanchi kariavolli ghoddun haddli.. Don’parchim 2.30 vaztam Hindi bhaxen dobajik porbechem Mis bhettoilem. Jharkhand, Bihar, Chhattisgarh, Kannadiga, Andhra Pradesh, Tamil Nadu, Nagaland ani Goykar lok novisam sangata ekttaim zavn Misant vantto ghetat.
Uprant moidanar khellacheo kariavolleo suru zaleo. Dor `item’ panch-panch novisamni khellant adar dilo. Hea vorsa Pilarchea 31 novisamni vantto ghetlo. Hi soglli kariavoll Novis Mastor Pri. Francis Carvalho ani tacho adari Pri. Alex Luis hanchea margdorxona khal soglli kariavoll zali. Soglleank Inamam, mittai ani khann-pivonn vanttlem. Oxe toren vhodde umedin gonvlleanchim Natalam zalim. Bro. Amadeu Kerkar hea dobajeak mukhel soiro ani Agnel de Raia inamam vanttunk hajir asle.
Gram sevokanche zage
bhorunk applications magleam
Ponnje: Sabar Panchayatinche Gram Sevokanche zage rikami asat te bhorun kaddpak Panchayatnchea Khateachea Direktoran `applications’ korunk magnni kelea. Janerache 16ver 5 vaztam adim `applications’ pavunk zai mhonnlam. Directorak zolmachi sertidanv, kitlem xikop kelam umedvarachem sogllem nanv ani potto boroun dhaddchem mhonn sanglam. Tosoch pastport size fottu ani 15 vorsanchi residence certificate’ hem sogllem Directorate of Panchayats, Junta House, 3rd. lift, 3rd floor, Panjim. he kocherint dhaddchem.
St. Bernadetteachea
jivitacher cholchitr
Telegu cholchitrkar Kamlakar Rao-an purai Francez kothechem xutting Kerollant korun tem cholchitr Gõyant dakovpachem tharailam. Cholchitrachem nanv 'Our Lady of Lourdes'.St. Bernadetteachea jivitacher adarlolem hem cholchitr toyar korche poilim sumar 8 vorsam Xri Rao Bernadetteachea jivitacher obheas kelo, ani xevttim 1 krutt rupia khorchun tannem hem cholchitr toyar kelem.
'Bernadetteachem jivit mhonnlear apleponn ballginastana keloli seva. Tichi sfurthi Madar Terezak legit ailea zait, oxem amchean mhonnum ieta,” oxem Xri. Rao sangta. Rao haka hache poilim Amerikent 'Accolade Film Award' dobajeant ani 2007 vorsa Sharjah UAE-chea 'Pause and Play International Film Festival'-ant cholchitram khatir puroskar favo zaleat. Aplem cholchitr to Inglez, Fracez ani Malayalam bhaxentlean dakounk sodta.
Kankonnchea panchayatimni Prantik Planacher obheas korpacheo somiti
Kankonn: Hea talukentlea ganvchea panchayatimni Prantik Plan 2021 hacher purayen obheas korpa khatir somiteo ghoddleat. Heo somiti tacher purayen obheas korun bhasabhas kortoleo . Loliem-Polem panchayatin 40 vangddeanchi somiti ghoddun haddlea. Toxench Poinguinim ani Kotiganv panchayatimni somiteo ghoddleat.
Usganvcho novo pul 23ver ugto zata
Usganv: Mhadei Nodicher Usganv bandlolea novea pulachi ugtavnni Janerache 23ver zatoli. Mukhel Montri Xri Digambar Kamat Ghor Montri Xri Ravi Naika hujir ugtavnni kortolo. Fattlea Mungllaradis Xri Ravin pulachi topasnni kelea uprant ugtavnnecho dis tharaila. Ho char vattancho pul xekim toyar zalo. Hea pulachi lambai 180 metram ani rundai 15 metram. Toxench 720 metrancho rosto pulak zoddta, taka 6 krutt rupia khorch zala. Gõyant ho poilo pul.
Maina Kudd’ttore soglleant
vhoddlem nokhetr
Kuddtore: Maina firgojentlea Vigar Pri. Gualbert Pereira-che ievzonne khal bhurgeamni Gõyant soglleam poros Natalanchem vhoddlem nokhetr kelam; tem sogllench stain-arxeanchem asa, pollevnk nazuk dista. Mon’xachi-i hikmot ani kola dusreank, odik korun tornnateank nove torecheo vostu ghoddun haddunk ut’tejon dita ani sudaropachea margar fuddem vhorta. Hich hikmot Pri. Gualbertachi disun ieta. Firgojentlea tornnateanchi kola oxich sudraunchi.
A Lua 15vea vorsacho dobazo korta
Merxe: Dezembrache 28ver A Lua puzadan jevnnam khannachi seva suru kelear 15 vorsam bhortat mhonn dobazo ghoddun haddlo `Noite de A Lua’ vo Chondrimachi Ratr mhonn songitachea ani nachache umedin dobazo kelo.
Majorda sudaropachea vavrak survat
Majorda: Hea ganvant kaim sudaropacho vavr bhov korun pula pondchea rosteacho vavr Sonvaradis thavn suru kela. Hea vavrak 2.92 krutt rupianchea khorchacho odmas kela. Mukhel Montri Xri Digambar Kamat-an 1.29 krutt rupia monzur kelea uprant hea varak hat ghala. sangtat te pormannem 4 te 5 mhoineam bhitor vavr sompunk zai.
Homepage
