Ut’tor Koreant jevnnachi goroz
Fuddlea vorsa Ut’tor Korea desantlea 40% lokak jevnnachea vostunchi goroz asa. Karonn desant sareachi ani zollvachi egdomuch tutt ailoli asa, oxem Ekvottit Raxttranchea jevnna-khannanchea agensimni sanglam. Vixv Jevnna Karyavoll ani Jevnna ani Xetki Songhottnnen jevnnachea vostunchea utpadonna vixim zagrutai haddlea. Hea vorsa Ut’tor Koreant 8 lakh tton orovachi tutt ailoli asa Haka lagun desantlea 23 milhanv lokantlea 8.7 milhanv lokak fuddlea vorsa jevnnachea adarachi goroz poddtoli mhonn sanglam..

Kandhamalchea Kristanvam khatir Natalancho somarombh
Bengllur xarant Dezembrache 8ver Global Council of Indian Christians hannim Orissantlea Kandhamal zil’leantlea Kristanvam khatir Natalancho somarombh kelo. Hea somarombhak hajir zaunk dhormvadak boli poddlolea 24 zannak Bengllur xarant haddlolim. Tanche modem vidva asleot tanchea ghorkarank Kristi bhavarta khatir jivexim marle. Hea dukhest lokan Natalancho `spirit’ onbhovunk hi lhanxi karyavoll Bharoti Kristanvanchea Vixv Mondollan ghoddun haddli mhonn Mondollachea raxttrik odheokx Dr. Sajan K. George hannem sanglem. Fattlea vorsa dhormvadache bhirantin tankam Kandhamalant Natalam somarombhunk mell’lim nant. Hea-i vorsa Orissant Natalam somarombhunk Kristanvank porvangi mell’li nam.

Mumbaintlea Pilarkarak `Ph. D Podvi
Mumbaint vavurtolea Pilarche Sonvsthechea vangddi Pri. Lawrence Fernandes,haka Ph. D podvi mell’lea. Tannem xikxonnik xonsodhan korun `A Comparative Study of Leadership Style of Principals in Secondary School of Mumbai” McGregor-ache khas theoricho ul’lekh korun aplo nibondh (thesis) boroilea ani Mumbaichea Mha-vidyapittachi Ph.D doctorate podvi zoddlea. Dr. Beena Khemchandani ani Dr. N. Pradhan, Barodache Vidyapitta-chea kha-teacho mukheli hanchea margdorxonna khal Pri. Lawrence Fernandesan aplem xonsodhan obheas kela. Tannem aplea jivitak apnnailolem brid mhonnlear “Sudaropak sodanch zago asa” adim taka “The Jewel of India” nanvacho puroskar favo zal’lo.; Pri. Lawrence Fernandesak V. Ixtt kherit porbim dita ani tachea xikxonnik vavrak borem iex anvddeta.

Madhya Pradeshant teg Kristanv Vidhan Sobhent nivddun aile
Halinch Madhya Pradeshantle Vidhan Sobhecheo vinchnnuko zaleot ani teg Kristanv amdar nivddun aile mhonn Bhopalche Arkidiosezichea Mha Gonvlli-Bapa Leo Cornelio-n apli khoxalkai porgottli. Madhya Pradeshachea 230 vangddeanche Vidhan Sobhechea vinchnnukam khatir 3,179 umedvaram modem 13 Kristanv umedvar ube ravlole, tantle teg nivddun aile. Dezembrache 8ver tancho nikall jahir kelo. Katolk Xavier Meda ani Joseph Pachilal Meda toxench Protestan Ratnesh Solomon; soglle Kongres pokxache tikettin vinchnnukank ube ravlole.Adle Vidhan Sobhent ekui Kristanv amdar naslo. Haka lagun Kristanv somudayacho avaz Vidhan Sobhechea ghorant aikunk ailona. He pavtt Teg Kristanv amdar aslolean Kristanvancho sad Sobhaghorant aikunk ietolo mhonntat.

Sorkarachea duddvacho durboll Kristanvamni upeog korcho
Ostom Bengalant sorkarachea nidhiche duddvancho durboll Kristanvamni faido kaddcho mhonn Montrean sanglem. Zaite pavtti sorkarachea ievzonneanche durbollam khatir aslolea duddvanchi Kristanvank khoboruch asonam mhonn sanglem. Rajeantlea olpsonkhechea somudayanchea lokachea boreponna khatir duddu astat te vaprinastana urtat. kristanvamni tancho durbollanchem sudarop korpachea kamank vapurche mhonn Montri Abdus Sattar-an sanglem.

Nagalandant poili xikxonnik porixod
Nagalandant, Dimapur Gonvlli-Bapachea Ghorant Dezembrachea mhoineant poilech pavtt xikxonnik porixod ghoddun haddli. Katolk Igorjen xikxonnik mollar kel’lea vavrachi molavnni korunk Kristi moliam vistarunk koxem kelam te vixim niyall ghetlo. Gonvlli-Bap Jose Mukala-n he porixodechi ugtavnni kortana sanglem. Katolk xikxonna vorvim somazachi novsornni korpachea vavrachem deivik apovnnem mhonn porixodek hajior zal’leank Gonvlli-Bapan sanglem.

Bharotant Poilem Katolk Vixv- vidyapitt
Assam rajeantlea Guwathi xarant Salesian Sonvsthechea misionaramni Katolk Vixv-vidyapitt (Catholic University) sthaplem ani Bharotachea Uttor-udent vattarant novo bhorvanso udelo. Hi ek vhoddli udorgot Katolk Povitr Sobhechea vavran kelea. Halinchea vorsamni Povitr Sobhek zaito dhumallo sonsunk ani avgodd oddchonneank fuddo korunk poddta. Torui astana Povitr Sobha Bharotache durboll porjechem sudarop korit fuddem veta. Hi Don Bosco University Bharotant unchamolacho vavr kortoli mhonn soglleank bhorvanso zala. Thoim bio-technology, Nursing, Business economy, Social Communication, Religion and Culture, Ethics ani Zativorgachea lokacher obheas hea sabar vixoyancher xikop ani xonsodhan korunk adar melltolo.

Mungllurant ontor- dhormacho mellavo
Mungllurantlea Bikarnakatte ganvchea Infant Jesus Igorjent ontor-dhormancho magnnea mellavo ghoddun haddlo. Hea mellaveacho hetu mhonnlear Mumbaichea akantvadak boli poddloleam khatir magunk ani xanti vistarunk. Mungllurchea Gonvlli-Bapa Aloysius Paul D’Souza ani her dhormanche dhormik fuddari mellaveak hajir asle. Gonvlli-Bap Aloysius D’Souzan ulovp kelem ani sogllea dhormanchea dor eka mon’xan sonvsaracho uzvadd zaun sotacho ani mogacho sondex porgottunk ani soglleam thaim bhavponnachea ekcharan jiyeunk ulo marlo. Dor eklechea chintpan thoddexem bodlop kelear amchean sonvsar sobhit korum ieta mhonn tannem sanglem. Sogllea dhormamni xanticho rosto cholunk zai mhonn Dr. John Fernandes-an sanglem. Pri. Nelson Pinto, ocd hannem xevottak soglleanche upkar atthoile.

Homepage