Liverpool Poile Suvater

English Premier Lig Futtbol khellant 20 'round'-am uprant Liverpoolan poili suvat melloilea. Tanchea 13 zoitam soit 45 gunn zaleat. Dusre suvater aslelea Chelseache 3 gunn unne, mhonnche 42 gunn zaleat.
Aitaradis zalolea khellant Liverpool-an New Castle-a add 5-1 golamni zoit melloilem.
Hea khellant Gerrardan don gol marle, zalear Sammy Hippia, Ryan Babel ani Shabi Alonson ek-ek gol marlo.
Azun-ui Liverpoolacho boreantlo boro khell zavpacho urla oxem hea pongddachea odhikareank dista. Sod'deache poristhitint aple khellgoddi khellant toxech khell'le zalear, aplea pongddak favo zavpi ostadponn konnuch chorun vhorpak xokona oxem tankam dista.
Ho khell harlo dekhun New Castle 20 ‘match’-intlean 22 gunn ghevn 13 ve suvater asa. Sod’deache poile 10 pongodd oxe asat. Liverpool (45), Chelsea (42), Manchester United (35), Aston Villa (35), Everton (32), Wigan (28), Hull City (27), Fulham (26) ani West Ham (25).

Pakistanak IPL khellpachi umed na?
Sod’deak Bharot ani Pakistan hanche modle rajki som’bond matxe tann (tense) zaleat tacho porinnam’ don-ui desanchea khella sombondancher zavpak lagla. Bharot sorkaran Bharotacher krikett pongddachi Pakistanak bhonvddi korpak na mhonnlam. Atam, BCCI-cho krikett khell suru zavpacho asa. Hea khellant bhag ghevpi pongddamni novea khellgoddeank bhitor kaddunk daram ugtim zatolim. Punn Pakistani khellgoddeank he pavtti vhoddlo ‘demand’ na. Oxe poristhitint Pakistanache khellgoddeank IPL-ant khellpachi-i vhoddlixi urba na.

Arsenalacho dollo New Castleachea 3 khellgoddeancher
Janer mhoineant thavn Inglandant khellgoddeancheo klub bodolpacheo halchali suru zatoleo. Heo halchali suru zatanch Arsenal New Castleache Shei Givan, Stevan Taylor ani Charles Zhogabia hanche kodde koblat korpache asat.
Boroch temp zalo Arsenal New Castleacho goli Givanacher dollo dovrun aslo. Tankam sod’deak boreantlo boro gol-rakhpi zai. Sodeak tori Irish khellgoddi Givan Premier Ligentlo boreantlo boro gol-rakhpi tharla. Punn 32 vorsam pirayecho Givan New Castle soddunk toyar na. Toxem pollevunk gelear taka zaiteach klubanchem apovnnem ailolem, punn tannem ekleak-ui kan halounk na.
Taylor ho ek atm-visvasan bhorlolo 'defender'. To Inglandachea 21 vorsam piraye sokoilea pongddacho mukhel. Tacho khell klub zannank avddunk lagla. Taka New Castle pongddant sodanch boro man mell'la dekhun to-ui hea klubak fatt korpak titlem sompem nhoi. Punn Charles Zhogobia Arsenalachea goreak farunk xokta. Taka New Castle pongddant favo toxi sond mellunk na.

Super Lig Krikett
Goa Cricket Association-an (GCA) ghoddun haddlole Super Lig krikett khell Janerache 2rer thavn suru zale. Hea khellant 10 pongddamni bhag ghetla. Hea 10 pongddanche don zome keleat. Poilea zomeant fattlea vorsacho ostad Salgaocar Sports Kluba soit Chowgule, Ponnji Gymkhana ani Premier Ligent B zomeant poilo zago mellovpi klubacho aspav asa. Dusrea zomeant GCA Colts, La Paz, MPT, MCC, GCA hea klubancho aspav asa.

Futtbolant Gõychea cheddeanchem zoit
Akhil Bharot Futtbol Mhasonghan ghoddun haddlolea 14 vorsam piraye sokoilea cheddvanchea futtbol Mohatsovant Gõychea cheddvanchea pongddan Haryana ani Orissa add zoit zoddlem. Poilea khellant Gõyan Orissa add 6-2 golamni, zalear tannim Orissa add eksurea golan zoit zoddlem.

Steffi Cardozak Rupeachi Medal
Hamirpur hangache 34ve Raxttrik Ostoreanchea khella mellaveant Gõychea Steffi Cardozan gullo xevttupachea khellant Rupeachi medal zoddli. Steffin hache poilim hea vorsant don bhangaracheo ani don rupeacheo medali zoddleat.

Vasku 2 golamni zoitivont
Goa Futtbol Association-an ghoddun haddlolea Goa Professional Lig futtbol khellant Vasku Kluban Dempo Sports Kluba add 2 golamni zoit zoddlem. Hea zoitan Vasku Klubache 13 ‘match’-intlean 13 gunn zaleat. Zalear Dempoche 12 ‘match’-intlean hi tisri har ani tanche 12 gunn zaleat.

Salgaocaranchem 5 golamni zoit
Gõy Futtbol Association-an ghoddun haddlole 14 vorsam piraye sokoile lig ‘match’-int Salgaocar Sports Kluban Vasku Kluba add 5-0 golamni zoit melloilem. Poilea bhagant zoitivont pongddan don gol marle.

Kunkolle Union final jikhlo
3rea Pio Jose Goveia yadostik Kop khellant Kunkolle Union Sports Kluban Sangolda Lightning-acher tie-breaker ritin 5-3 golamni zoit zoddlem.Zoitivont pongddak 25,000 rupia duddu ani ttrofi bhettoili, zalear Up-ostad pongddak 15,000 rupia duddu ani ttrofi bhettoili. Purai 70 mintanchea khellant don-ui pongodd gola vinnem badabad urlole pollevn umedin ho xevottacho khell pollevnk ailolea lokachim monam ani tonddam bavlolim.

Bhaktik ‘International Master’-acho dusro ‘norm’
Gõychem ‘chess’ khellantlem khellgoddi ani adlem Junior Raxttrik ostad Bhakti Kulkarnik ostoreanchea ‘International Master’-acho dusro ‘ norm’ melloilo. Tisro ‘norm’ melloilo zalear ti ostoreanchi
‘International Master’ zatolem.

Al Fatwak 2 gunn
Gõy Krikett Assoicationan ghoddun haddlole Premier Lig krikett khellant Al Fatwak Iqbal 11 add Poilea davant don gunn favo zale. Iqbal 11-an poilea davant 61 over-imni 194 dhanvddeo kaddleo.

Somnath Boys of Fonda ostad
Akhil Gõy Tennis Ball krikett khellant Fondemchea Somnath Boys of Fonda Kluban ostadponn zoddlem. Tannim Amazing Boys of Assolna pongddan haroile.