Voparinchea Bhanddarantlem:

“Faleancho dis aplo mhonncho nhoi”

Novem voros 2009 udelam. Bhorvanxeachem kirnn fankarlam. Hea novea vorsant amkam kitem ravta ti amkam khobor na, punn hea novea vorsant ami onnbhovtoleanv tem sukh-dukh, pidda-bholaiki koxtt-sontos Devachea hatantli mogan mandun ghevnk ami fuddem ttanch martanv. Vaitt ani boreo, zaiteo vostu amchea hatant nant teo hea vorsak ghoddtoleo. Amchean hache vixim kainch korunk zaina, punn Devachi khuxi mhonn teo ami manun ghevnk zai. Thoddeo vostu amchea hatamni asat ani tacho amchean bhorpur faido kaddum ieta. Vell konnakuch ravona. Sarloleo goddio porot mellonant. Vellacho bhorpur faido kaddtolo zalear ami to manddun haddunk zai. Omkea vellar khoinchi vost kelear bori, hachi zannvik amkam aschi. Vell mandun haddlo mhonn zaina, tea vellar tharailoli vost ami korunk proyotn korcho. Vellar uttop ani vellar nhidop chodd gorjechem. Vellar jevlear amche kuddichi vadd bore bhaxen zata. Magnneacho vell magnneak, T.Vcho vell T.V, khellacho vell khellak, xikpacho vell xikpak. Monis pirayen vaddot vochum, punn mon’xan xikpachem mat soddunk zaina. Aiz monis vachunk sodina. Devachem Utor vachlear, Devachea mogan ami bhortolim. Disallim masikam vachlear amchim monam zannvayen uzvaddtolim. Dis somptanach amchea disacho vell koso sarla tacher attapun ontoskornnachi chovkoxi korchi. Ani dusrea disacheo vella-goddio boreo upyogi korunk, proyotn korcho. Xiktolean anik-ui xikun, khelltolean anik-ui bori ‘practice’ korun, vazoitolean vazovpak odik mhotv divchem. Toyarek vell dilear kosli-i vost amchem dhean-mon lavun ti kelear tuka odik man ietolo ani tum kitem korta taka odik orth melltolo.
Bholaiki Devachem dennem amkam. Bholaiki aiz asa, faleam astoli zalear amkam khobor na. Bigoddloli bholaliki kednam porot mellta, hachi-i amkam khobor na. Hanv bhurgo, tornnatom, hanvem sonvsar pollevnk na, dekhun bholaikek mhaka odhikar asa, oxem-i amchean mhonnonk zaina. Amche modlim zaitim zanna bholaiki unni zatoch, piddent poddtoch borim zavnk Deva lagim magot astat. Punn Dev voiza sorxim vochun borim zavnk upai suchoita tem ani amchea bherea kanar ghetanv. Bholaiken bhorlolo monis aplem boll vaprun apnnak zai tem korta. Bholaiki vaprun amchean zaitem borem korum ieta, hem aicho monis visorta. Vhoddleancheo pidda osleo astat ki jivitbhor te sonstat. Thoddeancheo pidda tankam anturnaruch dovortat. Thoddeancheo pidda tankam ghora bhair vochunk addvartat. Osleanche osoktayent amchean boll zaum ietalem. Kiteak faleam kitem ravta tem amkam khobor na. ‘Health is wealth’ oxem mhonnlolem asa.
Devan torekvar xegunn mon’xachea jivitan vanttun ghaleat. Punn amkam thodde tori xegunn asat, hacho dubavuch na. Konn-konn gaita, vachta, vazoita, khellta, xinvta, randta, ‘acting’ korta, xikoita... he xegunn zo monis Devan dileat mhonn vollkhun gheta to Devak dhin’vaxi ravta ani aplea xegunnacho boro upyog korta. Zaite pavtti monis Devan dil’le xegunn vollkhun, gorvan bhorla. He xegunn vapurleat zalear apleak nanv zoddun ghevnk, manak ani podvekuch vapurleat. Apnnak vorte xegunn asat mhunnon, dusreank kikont keleat. Apnnak nant te xegunn dusreak asat mhonn khoxal zavche bodla, aicho monis nosayen bhorla. Khoimsor apnnak poixe melltole, kitle komaunk zatole, faido asa, thoimsoruch amche xegunn vaprunk ami fuddem sorleanv. Punn Devache mhoimek hi amchea xegunnachi tust kelear ami khoxal zaleanv, punn dusreanchea xegunnachi tust korunk amchi khaltikai amchea adarak pavunk na.
Novem voros nigtench udelam. Tacho boro faido kaddunk ani torekvar vattamni iesesvi zavnk, ami zaite tharav ghetleat astole. Tantum amcho vell bore bhaxen vaprunk ani Devan dil’lea vellacho boro upyog kelear, zaitem boreponn ami dusreanchea jivitant ximpddavnk ieta. Devan amkam bholaiki dilea ti borem tem utpon’n korunk vavurchi goroz. Bholaikechem-i dennem amkam kitlo kall astolem tem amchean sangunk zaina. Hea vorsant thambonastana amchi bholaiki, magnnem korunk, vavr korunk ani ek bhagevont jivit jiyeunk proyotn kelear amkam vorti khuxalkai favtoli. Devan dil’lea xegunnamni ami amchi Povitr Sobha ani amcho somaz bandum-ia. Te amkam Devan dileat mhonn vollkhun, amchea xegunnamni Devachem nanv vhodd zaum. Hea novea vorsant zaiteo boreo vostu ami kortoleanv. Tantum amcho vell, amchi bholaiki, amche xegunn Jezuchi bori khobor porgottunk amkam adarache zaum.

Nevel Vell’lekar