Novea Vorsant Amchi Jinn
thing well begun is half done is half done hi inglezintli mhonn’nni ami zaite pavtti aikolea. Survat mona pormannem zalear ticho xevott ami yeujilolo nikal ditolo oxem amchem dhoronn. Khoinch-i novi vost amkam urba ani khoxalkai haddta. Dor ek vost ami veg-veglle toren suru korunk yeujitanv ani suru kortanv. Dor ek goddi, dis, mhoino ani voros eka novea jivitachi, karyavollichi, nove dixechi ani avesvorachi survat. Novem voros osloch noveponnacho somarombh ani orombh. Zonn ekleachea jivitant, dor eka vorsachi survat, ek novo avesvor ugoddta ani nove dixen cholunk sfurti ani adar zata. Niktich ami Jezuchea zolmachi porob vhodde umedin, khoxalkayen ani ghonnghonnan somarombhlea. Jezuchea zolma udexim ek noveponn monis soimbak favlam. Ji novi kurpa, Jezuchea zolma vorvim amkam favo zalea, tache vorvim amchea atmik jivitak ek novi survat mell'lea. Atam, anondachea bhavnamni bhorun, dobajean hea novea vorsak ami survat dilea. Adlea vorsa borabor adleo vostu sanddun dileo. Novea vorsant ami zaitem amchea khasgi jivitant bodol'lam tacher niyall kelear, dubavinn amkam hea noveponnachi khatri melltoli. Amche bhitor vostolem sorv torechem vaitt soddun divn, jivitak novi, bori ani khori dixa ditole marog sodun kaddunk ami nichev ghetla. Jivitachi vadd odik nettan korunk hea novea vorsant ami tharav ghetla. Barik niyall’lear, hea novea vorsak ami khas toren yeukar ditanv. Novea vorsache survatek, Ankvar Maria, Deva Matechi porob ami somarombhtanv. Vorsacho orombh, jivitak khori dixa dakoilole, jivit samballtole amche sorginche avoychea sohokaran ami kortanv. Tinnem Jezuk hea sonvsarant zolmak haddun ek novo, porzollit deivik suria sonvsarant jiyetoleanchea jivitant fankoilo. Atam hea novea vorsache survate udexim heach deivik suriachim kirnnam amcher poddoxim ti korta. Xudh, nitoll, nirmoll jinn jiyeunk tich, hea novea vorsant amchi xeratin zata. Hea novea vorsant ami pavl marche adim, kitem hanv kortolom/kortelim hem ami amchea monant ghott chintun dovorlam astolem. Jem ami yeujilam tem purem korunk, xarti pavounk ami vavurtoleanv, hea amchea proyotna khatir amkam xabaski favo. Punn hem xarti pavoitana thoddeo vostu amchea monan rigovpachi goroz asa. Amchi jinn ami bore toren jieyunk sodtanv, oslea vellar chear bhag, je amchea jivitant probhav ghaltat te ami visrunk favo na:
a) Amchem khasgi jivit:
Zonn ekleachea jivitacho ho ek mukhi ani bhov moladik bhag. Amchea khasgi jivitant jem onnbhovtanv ani kortanv tacho porinnam’ nhoich fokot bhailean, punn amcheach jivita udexim disun ieta. Hea novea vorsant ami amchea khasgi jivitacher lokx dovrun, amkanch ami ut'tejon divn khasgi jivit rongit korunk hea novea vorsant ami bhar ghevnk goroz. Amcheach jivitak ami favo to respet man' ani dorzo divnk goroz.
b) Amchem kuttumbik jivit:
Monis eka kuttumbant zolmota ani vaddta. Amchea avoi-bapaichea sohokaran, adaran ani mogan amche jinnechi vadd fulun ieta. Kuttumbant jiyetolea dor eka vangddea sovem amchi khasgi chal zonn eklean mogache, somjikayechea ani dhir ditolea vostuncher manddun haddunk goroz. Hea novea vorsant amchea kuttumbant jiyetolea amchea avoi-bapai, bhavam-bhoinnam, ghorkara/ghorkarni, bhurgeam ani her dusream vangddeam sovem manan, mogan ani ekcharan jiyeunk vavrum-ia. Kuttumbik jivit nhoich kuttumbant jiyetoleam vangddeancher bogor zonn ekleachea khasgi jivitacher probhav ghalta hem, hea novea vorsant ami amchea monant, kallzant rigoun dovorpachi goroz asa.
c) Amchem somajik jivit:
Zonn ekleachi, khasgi toxench kuttumbik jivitachi vadd zatoli zalear somajik jivitachi goroz. Somazant jiyetoleam torekvar mon’xam sovem amchi khasgi vagnnuk, tache vixim amche vichar zobab, tanche sovem, tanchea dhorma, tanche chali-riti sovem, amche vichar ami nitichea, xantichea ani sohokarachea adaran manddun haddunk favo. Somazant jiyetolea dor eka vangddea sovem mogan, moipasan ani ekcharachea bandpasan ami jiyeunk favo, kiteak kaim vattamni tori somajik probhav amchea khasgi ani kuttumbik jivitant poddta.
d) Amchem poriavoronnik jivit:
Amchea jivitachi vadd, poriavoronnacher adarloli asa, dekhunuch poriavoronnant ghoddtolea torekvar bodolpancho soroll porinnam’ mon'xachea jivitant spoxttponnim disun ieta. Amchem jivit surokxitponnim jiyeunk amkam poriavoronnachi dor eka pavla khonn-khonni goroz asa. Amchea sorv bhonvtonnim aslolea poriavoronnacho ami samball korunk favo. Poriavoronnantlean amkam zai asloleo vostu favo zatat dekhunuch tacho upyog ani nhoi dur-upyog ami korunk favo. Hea novea vorsant, poriavoronnam sovem amchi zobabdari ami ollkhun ghevn, ti pallunk ami pavl marunk favo. Hea novea vorsant ami zaitem kitem fuddem vhorchem, zaitem novem korchem asa. Hem amchem karia ami kortana, ami amkanch kitem tori borem korunk favo. He toren amchi osmitai ami ollkhun ghevn amchea khasgi jivitant orth, rong haddunk favo. Ami vinchlolim, Devache apurbayechim bhurgim hem sot monant ani kallzant dovrun zo porzoll hea novea vorsant ami ghetla, toch dusreank porzollaunk goroz. Amche vagnnuke, chali-riti udexim novea vorsant ami nove dixen chol'lolim mon'xam hem amchea kornneam udexim ami soglleank dakounk goroz.
Oswin Gonsalves.
