Novea Vorsachem Umannem
Mon'xall Umalleamni Parkunchem
Novem voros, novem voros, fog foznneacho avaz ghonghonnamni suru zata. Lok duddu divn oslea suvatancher zoma zata. Novea vorsachem “hype” mon’xa bhitorlem polkeponn disun ieta. Pokoll mon’xak ghonnghonn avoddta. 'Empty vessels make more noise” Pokoll monis avaz chodd korta. Zaitea mon’xam sovem polkeponn bhitor sorlam. Hea polkeponnachea nadar te ghaltat sad. Polko monis Pornnem Voros sompoitana lachar zal’lea porim ogo zata. Pornnem Voros somptana taka sogllem polkem dista. “Novem Voros suru zata, Pornnea Vorsachi khobor konnak zai” he tallnnent to ghuspota.
Promannik mon’xacho zobab veglloch asta. Novem Voros suru korchea adim aplea Dhonia Devak to dhin’vasta. Khuxalkayen bhoron tachem kalliz Devachi vakhann’nni korta. Pornnea Vorsant Devacho axirvad onnbhovlolea khatir upkaranchea bhavnamni bhoron murgott’ta. Vorosbhor Devacho axrivad ghetleat mhonn tachea jivitant dhadoskai vaddta. Hi dhadoskai ghevn to xantponnim, Devacher patiyeun ani khuxalkayen murgottun Novea Vorsant bhitor sorta. Ghonnghonnak to chodd mol dina, kiteak tachea onbhova pormannem Dev ogeponnim aplo axirvad amkam favo korta ani amchea bhitor ek novem kalliz rochta.
Novea Vorsachea somoyar zaiteo sonvsari porampora choltat. Zaite pavtti ami heo porampora samballtanv. Novea Vorsachem umannem parkunk fostanv. Novea Vorsachem umannem parkunk don khas gunnanchi goroz asa. Amchea jivitant Devachi zagrutai ani dusrem mon’xall kalliz. Devachi zagrutay kiteak Devponn mhonnlear amchea svohbacho ek khas gunn. Hem khaxeleponn amkam mon’xall kallza vorim disun ieta. Novea Vorsant monisponn jitlem vaddtolem tilem Novea Vorsachem umannem parkunk pavtoleanv. Vorsachea xevottak dhadoxi zavnk, murgottun Novea Vorasant uddnam martoleanv.
Pornnea Vorsa zaiti zagrutai ailoli asa. Gram Sobhamni lok aple hok'k somzunk lagla, ‘Regional Plan’-achi odik somzonni magunk lagla, minachea udyoga sonvoyancher lokacho avaz vaddot veta. Novea Vorsant lok’raj bhogunk pavtole kai? Novem Voros amkam kitem novem haddtolem? Koslim novim avhanam ani sovloteo haddtolem tem ami pollevnk toyar zatanv.
Hea vorsa odik surokxa mondollachea asrea khal ami Novea Vorsant bhitor sortanv. Voros veta, veta odik ani odik monis nazuk zata, punn mon’xachem mol denvot veta; ani duddvanchem mol vaddta. Je lok duddvank chodd mol ditat tanchem kitem zalam tem ami aikolam “Economic Recession” Monis duddvank mol dita Mon’xachem mol sorvkall Devan tharailam ani tem kednach ibadd zaina.
Novea Vorsachem umannem khorem mon’xall umalleamni parkunchem. Hea parkonneacho ho khas ghutt. Novea Vorsachem umannem parkunk, mon’xall umalleamni amchem jivit bhorunk ami tumkam soglleank Khuxalbhorit Novem Voros 2009 anvddetanv.

Homepage