'Mhaka
kiteak poddlam'
rajki fuddaracher nodor marta
Barik
pollelear, Gõychea somazant nizacho Gõykar unno
zait veta, oxem mhonnlear lottkem zavchem na. Aiz amchea mannkulea
Gõyant Gõykarancho ankddo denvot asa ani to
rikamo zago bhorun kaddunk on-Gõykar Gõyant
yeun sust pennem korun asa mhonnlear zata.
Rajki mollar toxench veg-vegllea mollancher porian aiz on-Gõykaranchem
bhirem. Voileo ani motteo zutteo Gõykarank nhoi, punn
te on-Gõykar ghevn bosleat mhonn veg-vegllea serkari
khateamni ek bhett dilear thavem zata. Ani oslem vatavoronn
chaluch urlem zalear, Gõy sasnnak on-Gõykaranchem
ani Gõykar aple matient on-vollkhi ani videxi zavnk
vell naka mhonn Roseferns aplea 'Mhaka kiteak poddlam' hea
tiatrant bes-bore toren dakoll korta.
Gõychea rajki mollachea fuddara vixim tacho usko ani
tea mollavelem chitr fuddarak koxem ani koslem zaum yeta tem
machier soroll disun yeta.
Anton bab (Roseferns) ek sovtontr soinik (freedom fighter).
Tacho put Brian (Victor) soglleanche nodrek ek satvik pulis
inspector. Tachi potin Preeti (Roshan) aplea ghorkarak ani
sasupaik bhorpur respet-man dita.
Ek misionari madr Sr Valerie (Antonette) Orissa vattarant
vavurta ani Gõyam ailoli astana ti Anton babachea kuttumbant
pennem korta.
Gõychea serkarant Yadav (Roshan) ek montri koso vavurta
ani tacho put Santosha (Tari) Vidhan Sobhechi chi vinchnnuk
loddounk sodta. Vinchnnuk jikhtolo vo na? Vinchnnuk jikhonk
vaittovo bapui putak kosli budh dita?
Monant vaitt chintolo Yadav ani tacho khuni put aplea motdarsonghantlea
sogllea lokak aple muttint ghevn astat. Duddvanchea adaran
te tankam apleak zai te bhaxen khelloitat ani nachoitat.
Gõy vattavnk Gõycho put Jack de Sequeira-n kosle
tyag kele, tache vixim Roseferns-an boro ul'lekh kela ani
tachea panvlamni cholunk tornnateank to ek ulo marta. Hanga-thoim
Povitr Pustok-acho ul'lekh kel'lo mellta.
Komedi babtint Sally, Seby ani Brian-an eka-mekak boro sangat
dila. Kantaram babtint Tari-n gailolem solo kantar toxench
Peter-Roshan-achem duet boro sondex ditalim. Antonette, Peter-Roshan,
Maythan, Victor, Tony de Ribandar ani Brian-an gailolim kantaram
aikopa sarkim aslim.
Konknni machier kel'lea vavra khatir V Ixtt Roseferns-ak porbim
dita ani Gõychea somajik vixoyancher bhor ghalun, anik-ui
dorjedar tiatr Gõykaram mukhar haddunk magta.
P Agxekar
Homepage |
