Vachpi Boroitat

Udkachea vhallamni kuslolem udok
M.S; Santtun urlolem udok kusta ani tantum zollari zolmotat mhonn ami zannonv. Heo zollari magir malaria vo anik kosli-i tori pidda mon’xak haddta. Oxem adim zaite pavtti Gõyant ghoddlam ani kitloch lok morun gela. Atam vokhtam asun rokddea rokddo upai kortat. Punn vokhtam asat ani pidda zatoch upai korum ieta mhonn ogem ravunk favona. Veta thoimsor bariksannen pollelear kitleach vhallamni udok dhoron urlam ani kuslam, te vatten vetana ghann marta. Thodde vhall konnuch pollevnk pavonant. Dekhun amchea Bholaike Khatean kednam-kednam tori hea vhallanchi pollevnni korunk zai. Ganvamni nitollkai atam unni zalea. Zaito lok aplo kochro kaddun rosteanche deger, vhallamni ani mellot thoim uddoitat. Amchea sorkari mon’xank, amdarank ani montreank hachem kainch poddlolem na. Tankam hem pollevnk adar zai zalear mhojean legun dakoum ietalem. Ek svater vhall asa tachem udok nodint vhochpachem, punn modench to vhall kochrean, matiyen purovla ani pavsachem udok bhoron kuslam. Thoimsoruch ghoram asat, tevxilean amdar-ui ieta- veta, punn dolle asun kudd’dde mhonntat tosli got amchi zalea.
Vincent Carvalho, Ponnje.

Xanticho Sondex Vistarum-ia
M.S; Jezu xanticho kunvor. To mon’xa rupan amche modem ailo. Tachea ienneak moniskull axetalem. Jezuchea zolma disa Anjeamni gayon gavun xanticho sondex dilo. Punn ho sondex aiz soglleank mell’la kai? Fattlea Agostant Khandamal Orissak Kristi lokak dhormvadeamni dhumallo dilo. Tanchim ghoram ani igorzo moddun ani lasun uddoilim. Novembrache 26ver akantvadeamni Mumboint thorthoreacheo ghoddnneo korun inosent lokak marle ani zaitea zannank zokhmi kele. Taj Mahal Hotel, Trident ani Nariman House hea suvatancher khub luskon kelem. Ami Jezuchea zolmachi somarombhnni kelea. Hi somarombhnni orthabhorit zatoli zalear ami poile svater Jezun haddloli xanti sogllea mon’xank vistarunk vavrum-ia.
–Ayres Sequeira, Salvador do Mundo.

Devnogri ani Romi sangatan cholum-di
M.S; ‘Konknni khatir zomat kednam?’ he khobrevelean gomlem Mukhel Montri Digambar Kamatan zomat gheta mhonn sangloli ti azun korunk na. Hanvem-i aikol’lem ek up-somiti ghoddun haddlea tachi ek boska zatoli ani 60 disamni tacho riportt diuncho. Punn hi zomat azun-ui zavnk na. Jem kitem Devnogrintlean chalik laitat tench Romi lipintlean-ui chalik lavchem mhonn maglolem. Don-ui lipi borabor chol’lear kosli ontor tench somzona. Soglleo lipi xikle ani tancho vapor kelo zalear kitem vaitt asa? Fokot borovp korunk bhar thokos ghevn xikchem poddtolem. Khoinche-i toren xiklea bogor zavchench na. Zannaramni xikoilam nhoi! Nagrin boroitat toxench Romint-ui bore bhaxen borovnk zata, Evropi padrimni apnnak sompem poddta toxem tannim Konknnint zaitem moladik sahitya rochun dovorlem; nagrintlem sahitya khoim mellta, tem konnem-i dakounchem, zhuzam korunk nhoi, punn obheas korche khatir. He proxn pois-pois ravun potrancher borovn suttave zaitxe na. Punn ekamekacher fator xevttilolea porim zatolem. Toxem zalear kitem borem ietolem? Dekhun mhoji ek suchovnni: thodde romivale ani thodde nagrivale eka mezar bosun obheas kelear boro, oxem mhaka dista. Loka modem futt ghalum nakat. Futti ghalpachi ievzonn devcharachi. Hench korunk amche modem rakhos ubho zala. Chotrai dhorat.
Mario de Souza, Mhapsa.

Pulisek xabaski
M.S; Mumboint akantvadacho thorthoro zalea uprant sogllech zagrut zaleat koxe dista. Gõyant natalanchea disa pulisen ratchea Misa vellar surokxechi bori vevostha keli, tankam amchi xabaski.
Oxech toren tannim surokxa korchi goroz asa. Hanga thoim fottkireo khobro zatat tancheru-i tannim bhov fikir ghevnk zai. Akantvadi borea loka modem ghustat ani aplim vankddi kortubam adartat. Dekhun nhoich pulisen punn zonn eklean xidduk asop gorjechem.
Santana Fernandes, Navele.

Homepage